Родо-тукым увер
Конгресс
3-8 мартыште Ханты-Мансийск олаште Тӱнямбалысе оленевод-влакын VII конгрессышт лиеш. Тушко 29 кундем гыч делегат-влак мият. Тушто ХМАО-Юграште пӱчым ончымо пашам каҥашат, организаций-влакын отчётыштым колыштыт. Пытартыш кечын «Оленеводы мира» ассоциацийын декларацийжым пеҥгыдемдат.
Ушныза фотоконкурсыш
«Ава да йоча-влак национальный вургем дене» кумшо тӱнямбал фотоконкурсыш 25 август марте пашам налыт. Тушко ава, йоча, тыгак ача, кова, коча да ешысе моло еҥат ушнен кертеш. Ик конкурсант деч ик пашам колтыман. 15 сентябрьыште 200 финалист ден 50 сеҥыше пале лийшаш. Организатор – Ӱдырамаш-влакын интернациональный ушемышт. Чыла условийым www.ethno-photo.com сайтыште рашемдыман.
УШЕШТАРЕНА: 2021 ийыште ты конкурсышто Марий Элын сулло артисткыже Алина Егошина ӱдыржӧ дене сниматлатме фотографийыштым колтен. Фотограф — Андрей Иванов. Тиде паша сеҥыше радамыш логалын! А «Кугарня» газет ты фото дене 2022 ийлан календарьым келыштарен.
«Кандалакши гыч ӱдыр»
Тыге манеш соцсетьлаште шкенжым Аня Данилова. Тудо йоча годсо шонымашыжым илышыш пурташ – художник лияш – Петрозаводскыш толын. Сӱретче комикс-влакым ышта. Тӱҥ персонажше – шкеже, но Какан лӱман маскан образыштыже. Комиксыште тудын пелашыже – Пекаку лӱман пире образыште. Тыгак мужырын Кубик лӱман пийышт, Лось ден Лисичка йолташышт улыт.
Воза «Кугарня» газет.