Лач тыге Марий Элын чапшым араленыт Москошто Шабдаровмыт еш.
19-23 январьыште Москосо ВДНХ-ште «Россий» тӱнямбал ончер-форумын площадкылаштыже «Родные – Любимые» Российысе еш форум эртаралтын. Ты шкешотан мероприятийыш элнан тӱрлӧ лукшо гыч 1000 утла еҥ миен.
Сеҥымаш
Чылаже тиде форумыш 250 еш толын. Нуно моткоч уста, ойыртемалтше, мастар улыт. Шкеныштым тӱрлӧ семын тергеныт. Шабдаровмыт кум номинацийыште выступатленыт. Марий еш «На все руки мастер» ден «Семейное шоу талантов» номинацийлаште сеҥышыш лектын. А «Знатоки Родины» номинацийыште зритель-влакын призышт дене палемденыт. Тидыже кугу сеҥымаш! Тышке шуаш полшышо, конкурс годым пелен лийше вуйлатыше-влаклан суртоза газет гоч кугу таум каласа.
23 январьыште тиде форумыштак Российыште Еш идалыкым официально почмо, участник-влаклан концертым ончыктымо. Тыгодым кугу залыште марий ешым нылымше радамыш вераҥденыт. Концерт годым сценыш куд ешым ӱжыныт. Ты радамыш Шабдаровмытат логалыныт. Нуно Денис Майдановын «Пролетая над нами» мурым мурымыж годым пырля шогеныт, муреныт да сем почеш моторын лӱҥгалтеныт.
Концерт мучаште сценыш Президент В.Путин лектын да чылаштым Еш идалыкым почмо дене саламлен. Тудым ужмылан еш-влак куаненыт да унала ӱжыныт.
Вашке, 20 февральыште, Татьяна Эриковна ден Сергей Анатольевич Шабдаровмыт жемчуг сӱаным, 30 ий пырля илыме жапым, пайремлат. Тиде чесле пайремышт дене саламлена да, пеҥгыде тазалыкым, ятыр куаным тыланен, марий йӱлам аралымаште, кундемнам чапландарымаште таум ойлена.
Тӱрыс статьям «Кугарня» газетыште лудаш темлена.
