Дмитрий Чекулаев республикнан лӱмжым тӱнямбал кӱкшытыштӧ арала. Кызыт тудо Российын ече дене спорт мастерже, Марий Эл Республикын ече дене сборный командыжын участникше.
Д.Чекулаев Йошкар-Олаште спортсмен ешыште шочын-кушкын, ачаже Владимир Александрович – ечызе, аваже Ирина Николаевна – волейболистке, а кочаже Александр Васильевич велоспорт дене заниматлен.
– Изиэм годым ачам мыйым тренировкыш пырля коштыктен. Кортышто ече дене куржталмыж годым мый тупысо рюкзакыштыже шинченам. Кугурак лийме семын шкежат ече дене кошташ тӱҥалынам. 1-3-шо класслаште тунеммем годым ачам дене тренироватлалтынам, а 2000 ий кеҥежым тренер Лидия Геннадьевна Онучина мыйым шке шулдыр йымакыже налын, – шарналта рвезе.
Ече дене куржталме деч вара Дима кас еда каратэ дене занятийлаш коштын. Спортын кок видшат самырык еҥлан келшен, но нагрузко кугу лийын, адакшым окса йодышат лектын. Каратэлан тӱлаш кӱлын, а ече дене оксам тӱлыман огыл. Сандене тудо кокымшыжым ойырен налын. Туге гынат каратэм йӧршынлан кудалтен огыл, Йошкар-Ола первенствыште кумшо верыш лектын да ош пояс дене палемдалтын.
1-6-шо класслам Йошкар-Оласе 2-шо №-ан школышто тунеммеке, 2004 ийыште Д.Чекулаев Республикысе олимпийский резерв училищыш тунемаш каен. Индешымше класс марте тушто шинчымашым поген. Но сеҥыше-влак радамыш логалын огыл, эре гаяк шеҥгелне кодын.
Училище деч вара Марий радиомеханический техникумыш «Экспулатация электро-транспортного оборудования» специальность дене тунемаш пурен. Тушто студент-влак кечывал деч ончыч тунемыныт, а касвелеш спортлан жапым ойыреныт.
– Техникумын ече дене командыже республикыште ик эн виянлан шотлалтын. Тусо спортсмен-влак эре сай результатым ончыктеныт, формыштат шерге лийын. Тушко логалаш эре шоненам, собеседованийым эртымеке да нормативым сдатлымеке, мыйым командыш налыныт, – каласкалыш Дмитрий.
– Икымше сеҥымашетым шарнет мо?
Тунам могай шижмаш лийын? – 2005 ий февральыште кыдалаш-специальный шинчымашым пуышо организаций-влак коклаште ече дене спартакиаде эртаралтын. Тушто 15 меҥгым куржынна. Тунам мый сеҥымашын тамжым икымше гана шижынам. Медальым пуымо да пӧлекым кучыктымо тат поснак шарналт кодын. Тиде сеҥымаш ончыкыжым сай результатыш шуаш шӱкал-тышым ыштен.
Сбор, ямдылалтмаш, таҥасымаш… Тыге Д.Чекулаев ятыр вес олаш миен коштын, сай результатым ончыктен.
Кажне ийын ноябрьыште Россий гыч команде-влак Коми Республикысе Сыктывкар олашке коштыт. Тушто лум ондакрак возеш, сандене тылзе наре тушто ямдылалтыт. Вара таҥасымаш-влак лийыт. Тушто 2009 ийыште Д.Чекулаев визымше верыш лектын. Тидлан кӧра юниор-влак коклаште эртаралтше тӱнямбал чемпионатыш логалын. Тушто тудо тӱжем еҥ кокла гыч 26-шо верыш лектын.
– У ий деч вара Санкт-Петербург олаште вес таҥасымаш лийын. Икымше кечын классический ход дене мый кокымшо верыш лектынам. Тунамак спорт мастерыш кандидат лӱмым пуат манын ойленыт. Тудо йӱдым мый мален кертын омыл, умылтараш лийдымын чон вургыжын. Кокымшо кечын сборный команде дене эстафетыште 1-ше верыш лектынна. А кумшо кечын 15 меҥгым кайымаште 3-шо толынам, – ойла ечызе.
Дмитрий тӱрлӧ олаш таҥасымашыш коштын, тунамак МарГУ-што Физический культур направлений дене шинчымашым поген.
2012 ийыште Ижевск олаште таҥасымаш годым Российын спорт мастерже лӱмым сулен налын. 2014 ийыште МарГУ-м тунем пытарымекыже, Димам республикысе спорт подготовко рӱдерыш налыныт. Тудым Евгений Григорьевич Рыбаков ямдылаш тӱҥалын да ондак республик, вара Россий кӱкшытыш луктын.
Д.Чекулаев кеҥеж пагытыште Мордовий Республик ден Угарман кундемысе командыла дене пырля ямдылалтеш. Нунын дене Российын сулло тренерже Н.Е.Седов пашам ышта. Шке жапыштыже тудо Российын сборный командыжын тренерже лийын.
– Тый ала вес эллашкат тренироватлалташ миенат?
– Мордовий ден Угарман кундемласе командыла дене пырля Финляндийыш «вкаткыш» миенам. Тушто мланде йымалне 2,5 меҥге кутышан шкешотан тоннель уло. Лум вочмеке, пӱртӱсыштӧ тренироватлалтынна. Туштак мый палыме спортсмен-влакым вашлийынам: Кайса Мякяряйненым, Ийво Нисканеным, тыгак Корей, Китай, Норвегий гыч спортсмен-влакым.
Вара Финляндий гыч Швецийыш каенна. Тушто таҥасымаш лийын. 158 еҥ кокла гыч 55-ше верыш лектынам. Россий сборныйын ямдылымыже садак шке результатшым ончыкта.
– Лишыл жапыште мо тендам вуча? Кушко каеда?
– Арня гыч уэш «вкатке» лиеш. Ты гана ме Пермь кундемысе Губаха олаш каена. Тушто Коми Республик дене таҥастарымаште арендылан ак шулдырак. 27-29 ноябрьыште Сыктывкар олаште Россий кӱкшытан таҥасымаш лиеш.
– Кызыт республикыште спортын вияҥмыжым кузе аклет?
– Икмыняр ий ончыч Кортысо ече базышке электротулым шупшыныт. Ынде саҥгаш понарым пижыктен кошташ огеш кӱл. Тыгак лыже-роллерный трассым ыштеныт. Тушто меат тренировкым эртарена. Окса полышат шижалтеш. Тидын деч посна спортым писын вияҥден колташ неле.
Ӱшанена, Дмитрийым умбакыже тӱнямбал кӱкшытан таҥасымаште сеҥыше-влак радамыште ужына.
Рвезын альбомжо гыч налме фото.