25 март — тӱвыра пашаеҥын кечыже. Тиде кечын Э.Сапаев лӱмеш Марий кугыжаныш опер да балет академический театрыште тӱвыра министерствын коллегийжын кумдаҥдыме заседанийже лие.
Тӱвыра министр Константин Иванов палемдыш: эртыше ий неле лийын гынат, лектышлан поян. Шындыме тӱҥ задаче-влакым шуктымо. Погынышо-влаклан 2020 ийысе тӱвыра пашам иктешлыше фильмым ончыктымо. А кугешнаш уло мо дене. Мутлан, эртыше идалыкыште 7 тӱвыра пӧртым уэмден ачалыме, У Торъял посёлкышто модельный книгагудым почмо, 3 сымыктыш школ ден И.С.Палантай лӱмеш тӱвыра да сымыктыш колледжлан у музыкальный оборудованийым налме. Т.Евсеев лӱмеш Национальный тоштерын тӱҥ зданийжым ачалыме, Козьмодемьянск оласе книгагудым тӱзатыме, Шереметев замокышто ачалыме паша кая.
Министрын палемдымыж почеш, 2021 ийыште тӱҥ виктыш семын «Тӱвыра» национальный проектым умбакыже илышыш шыҥдарымым шотлыман. Тений тӱвыра пашалан республикысе бюджет гыч 1 млрд 626 млн теҥгем ойырымо (эртыше ий дене таҥастараш гын, 157 млн 740 теҥгелан шукырак). Федеральный бюджет гыч республикыш 440 млн 399 теҥге толеш. 1 июль марте Я.Эшпай лӱмеш Марий кугыжаныш филармонийым почшаш улыт. Советский район Вечын да Волжский район Сотнур селалаште тӱвыра пӧрт-влакым капитально ачалаш палемдыме, Шернур район Марисола клубышто леведышым вашталтат. Кужэҥер, Морко, Советский, Юрино районласе 4 йоча сымыктыш школым уэмден ачалат, 7 районыш автоклуб-влакым налыт.
Вашлиймаште тӱвыра аланыште ойыртемалтше-влакымат палемдышт. «Кугарня» ГУКП-н директоржо Эдуард Аркадьевич Иманаевлан, мутлан, РФ цифровой вияҥмаш, кыл да калык-влакын пашашт шотышто министрын таумутшым кучыктышт. Саламлена!
Евгений Никифоровын фотожо.