5 мартыште Марий Эл Республикысе прокуратурышто пресс-конференций лийын. Тудо вашмутланымаш семын эртен. Прокурор Сергей Беляков журналист-влакын йодышыштлан вашештен. А йодыш-влак илышын тӱрлӧ шӧрынжым авалтеныт: корным ачалымаш, «наливайке-влакым» петырымаш, пашадарым жапыштыже тӱлымаш, муковисцидоз черан йоча-влакын аваштын пикетыш лекмышт, общественный транспортын пашаже да молат. Чыла нине йодышлам прокуратур контрольышто куча.
Еҥ-влакат прокуратурлан ӱшанат. Ӱмаште 2018 ий дене таҥастарымаште еҥ-влак тушко 15,7 процентлан шукырак тӱрлӧ йодыш дене миеныт. Прокурор-влак нунын праваштым аралаш полшат. С.Беляков каласен: республикысе прокуратур журналист да еҥ-влак дене эре мутланаш ямде, вет тидыже кундемыштына правопорядкым пеҥгыдемдаш полшышаш.
Республикысе прокурор законностьым да правопорядкым пеҥгыдемдымаште пырля пашам ыштымылан, еҥ-влакым правовой йодышла дене палдарен шогымылан «Марий Эл» ГТРК-ан пашаеҥже-влаклан да «Кугарня» газетын ответственный секретарьже Ирина Ямбаршевалан тауштымашан серышым кучыктен.