Марий Элын бюджетше тений 2312,4 млн теҥгелан ешаралтеш. А 2022 ийыште республикын казнашкыже 1956,9 млн теҥге, 2023 ийыште 1444,3 млн теҥге утларак окса пурышаш. Законыш тыгай вашталтышым пуртымо шотышто Марий Элын шымше созыв Кугыжаныш Погынжын латкандашымше сессийыштыже депутат-влак йӱкленыт. Окса чондай тӱҥ шотышто налог кӱшеш пойдаралтеш.
Депутат-влак ты сессийыштак Марий Эл Республикын Конституцийышкыже тӧрлымашым пуртымо йодышым онченыт.
Кодшо ийын июльышто эл мучко йӱклымаш деч вара Россий Конституцийыш икмыняр тӧрлымашым пуртымо ыле. Марий Элын Конституцийжымат ты вашталтышлан келыштараш кӱлын. Икымше лудмаш ӱмаште декабрьыште Кугыжаныш Погынын латвизымше сессийыштыже эртен. Кокымшо гана законым илышыш пуртымо шотышто депутат-влак латшымше сессийыште йӱкленыт. Но тунам икмыняр партийын еҥже-влакын торешланымыштлан кӧра (закон вийым налже манын, йӱклышӧ-влак кокла гыч 2/3 ужашыже тидын дене келшымыжым ончыктышаш) кӱлеш наре йӱкым поген сеҥыме огыл. Латкандашымше сессийыште лийше 48 депутат гыч 47 еҥ тӱҥ законыш тӧрлымашым пуртымо верч йӱклен.
Чылаже 8 тӧрлатымаш пурталтеш: элыште илыше-влакын социальный илышыштым саемдыме, республикыште тӱвырам аралыме да вияҥдаш полшымо нормо, Марий Элыште илыше чыла тӱрлӧ калыкын шкешотан тӱвыра ойыртемжым аралыме да моло шотыштат.
Э.Иманаев.