Школыштына кажне ийын Вӱдын кечыжым палемдена. Кораксола ялна покшелне верланыше Раман пӱя воктеке чыланат рӱж лектына да «Ару сер» акцийым эртарена. Ты пашалан мемнам кугурак вожатыйна Елена Валериановна Григорьева кумылаҥден шога.
Теният тиде акцийыш уло кумылын ушненна. Тӱҥалтыш класслаште тунемше йоча-влакат шке класс вуйлатышышт Людмила Николаевна ден 6 классын вуйлатышыже Надежда Геннадьевна мемнан деке ушненыт. Ме пӱя воктене чыла куштырам поген налынна. А куштыраже шуко погынен огыл, молан манаш гын Кораксола ялыштына пеш сай калык ила. Кол кучаш вӱд серышке толыт гынат, шӱкым ышташ огыт тырше.
Раман пӱя улмылан пеш куанена. Тушто колжат шуко. Калыкынат чонжо куана. Вес ийынат «Ару сер» акцийыш ушнаш шонена.
Дмитрий Егоров.
Морко район, Шӱргыял школ.
Снимкыште: Вӱдын кечыже вашеш «Ару сер» акцийыш ушнышо чолга тунемше-влак.
