Тений «Земский доктор» ден «Земский фельдшер» программе-влак почеш районлаште 14 врач да 3 медпашаеҥ пашам ышташ тӱҥалын.
Медведево районысо рӱдӧ эмлымверышке ныл, Оршанке районысо рӱдӧ эмлымверыш кум, Звенигово районысо рӱдӧ эмлымверысе Красногорский эмлымверыш кок врач пашаш пуреныт. Ик врач дене Йошкар-Оласе 2-шо №-ан поликлиникын Семёновский врачебный амбулаторийышкыже, Шернур ден Советский районласе рӱдӧ эмлымверлашке, Марий Турек районысо Хлебниково врачебный амбулаторийышке да Медведево районысо Лӱльпанысе участковый эмлымверыш каеныт.
Ик фельдшер дене Марий Турек районысо Сысоево ялысе ФАП-шке, Килемар районысо Вӹзӹмйäр посёлкысо врачебный амбулаторийын Красный Мост посёлкысо ФАП-шке пуреныт.
Медведево районысо Нурма (Пиясир) врачебный амбулаторийын Яныкайсола ялысе ФАП-ыште акушерке пашам ышташ тӱҥалын.
Кокла шинчымашан медпашаеҥ-влак тора верышке пашаш каеныт, нунылан 750 тӱжем компенсацийым пуат. Марий Турек, Звенигово да Медведево районлашке кайыше кум врачлан миллионат пеле оксам ойырат, молылан – ик миллионым.
Тений чылаже нине программыла дене 34 медпашаеҥ дене договорым ыштышаш улыт.