Тений Медведево посёлкылан да районысо икмыняр яллан 300 ий темеш.
Ондак Медведево ял лийын, вара тудо шарлен, посёлкыш савырнен. А 80 ий ончыч, 1943 ийыште, Медведево районым ыштыме. Тудын историйжым пален налаш Медведевысе историко-краеведческий тоштерышке мийышым. Тушто 20 апрельыште «Во деревне то было, в Медведево» ден «Пройдём по улицам знакомым» ончер-влак почылтыныт. Икымшыштыже акрет годым Медведево кундемыште илыше-влакын ӱдырамаш ден пӧръеҥ вургемыштым (тувырым, шовычым да молымат), тыгак ӱдырамаш-влакын оҥыш сакыме сӧрастарыш-влакым ончыктымо. Кокымшыштыжо ончычсо Медведево, тудын уремлаже, кевыт ден моло объектше, еҥже-влак дене палыме лийына. 100 утла фотокатычкым ятыр еҥын фотоальбомжо гыч налын погымо. Ты пашам Медведево районысо книгагудын пашаеҥже-влак дене пырля шуктымо.
Тоштерыште 14 еҥ пашам ышта. 2008 ий годсек тудым Лада Владимировна Иванова вуйлата. А мыйым тоштерын выставкыла да районын, яллан историйже-влак дене 2015 ий годсек экскурсоводлан пашам ыштыше М.И.Иванов палдарыш.
УМБАКЫЖЕ — «КУГАРНЯ» газетыште лудса.
