24 апрельыште Марий Эл Кугыжаныш Погынын шымше сессийже лийын. Тушто 15 йодыш ончалтын.
Марий Элым Вуйлатыше Ю.Зайцев Правительствын 2024 ийысе пашаж нерген кугу отчётым ыштен. Тушто республикыштына экономике, промышленность, ялозанлык, илыме вер да моло сферыште шуктымо паша нерген каласкален. Нацпроект-влакым илышыш шыҥдарыме, калыкым тургыжландарыше йодышлам авалтен: газификаций, корно, школым чоҥымаш, транспорт, чодырам аралымаш да молат.
Ик куандарыше уверже – тений идалык мучаш марте Йошкар-Оласе аэровокзал ямде лийшаш. Палемден: взлётно-посадочный полоса идалык мучаште ямде лиеш, а тичмаш паша 2028 ийыште мучашлалтшаш. Чыла сомыл шукталтмеке, мемнан аэропортыш кугу, 200 пассажирым шыҥдарыше, самолёт-влакат чонештен толын кертыт.
Марий Элын айдемын праважым аралыме шотышто уполномоченныйже Ф.Мухаметгалиев шуктымо пашам радамлен. Звенигово ден Советский районлаште мировой судья-влакым пеҥгыдемдыме. Кугыжаныш Думо пеленысе Молодёжный парламентын представительжылан Кугыжаныш Погын деч М.Дороговам сайлыме.
Республикысе референдум, социальный полыш шотышто законлашке вашталтышым пуртымо. Депутат-влак Кужэҥер районышто Халтурино ден Изи Чарнур яллам иктыш ушымо, Изи Чарнур манаш палемдыме шотышто йӱкленыт. А У Торъял, Шернур, Волжский районлам округыш савырыме да ты шотышто актлашке вашталтышым пуртымо.