Марий Эл Республикысе Шуко функциян рӱдер (МФЦ) Российын Экономикым вияҥдыме министерствыж деч тауштымашым налын.
Тудым Республикысе Правительстве Председательын алмаштышыже Д.Троицкий дирекцийлан кучыктен. Кундемысе шуко функциян рӱдер «Лучший многофункциональный центр России» конкурсышто сеҥыше радамыш логалын да «Малая региональная сеть МФЦ» категорийыште лауреат лийын.
Тушко элнан 70 субъектше гыч 149 участник ушнен. Тыгай конкурс 2015 ий годсек эртаралтеш. Ты жапыште Марий Элысе рӱдер кум гана сеҥышыш лектын.
Кызыт кундемыштына 17 МФЦ пашам ышта. Кажне кечын тушко тӱрлӧ йодыш дене 3 тӱжем наре еҥ мия. Тыште 200 утла кугыжаныш ден муниципальный услугым пуат.
Чыла рӱдер ден офис воктене йӧнан парковкым, пандусым келыштарыме, а кӧргыштышт каныме верым, йоча лукым, электрон черетым, Госуслуги порталыш пураш йӧным ыштыме. Пытартыш жапыште суткаште 24 шагат да арняште 7 кече пашам ыштыме шот дене ятыр услугым электрон форматыш кусарыме.