Марий Элыште Стандартизацийын, метрологийын да испытанийын кугыжаныш рӱдержым 90 ий ончыч почмо. Тусо пашаеҥ-влакым Марий Элым Вуйлатыше Ю.Зайцев саламлен да наградым кучыктен.
– Тендан тыршымыланда кӧра еҥ-влак лӱдыкшыдымӧ да сай качестван сатум налыт. Предприятий-шамычлан ӱшанле стандартизаций системым ыштеда. Шуктымо сомылда моло отрасльлан, эн ончычак промышленностьлан, ончыко каяш полша, – каласен Юрий Зайцев.
Пайремле погынымаш деч ончыч Марий Элым Вуйлатыше выставкым ончен лектын. Марий ЦСМ директор Алексей Сазонов экспонат-влак нерген каласкален. Тыгак Ю.Зайцев объёмный расходный газым висыме лабораторийыште лийын. Стандартизацийын, метрологийын да испытанийын кугыжаныш рӱдерже технический регулироватлымаште услугым пуа да оборонно-промышленный комплекс радамыш пура.
Марий ЦСМ-ыште 500 тӱрлӧ измерений средствалан поверке ден калибровкым ышташ 1 200 высокоточный эталон ден у оборудований улыт. Рӱдер республикнан экономикышкыже да элнан научно-технический пашашкыже кугу надырым пышта. Тыште тиддене огыт серлаге: экологий, пашам аралыме, кочкыш сатум да электротулым тергыше у лабораторий-влакым почеш. Тидыже рӱдерым вуйлатыше-влакын жапын йодмыжым шуктымышт да ончыкылык нерген шонымышт нерген ойла.
Марий Элым Вуйлатышын тауштымашыж дене метрологический энергоиспытаний пӧлкам вуйлатыше Андрей Курис ден геометрический ден механический измерений пӧлкам вуйлатыше Алексей Ушаковым палемдыме.
