Пызлышудо (пижма) шукшым пытара, шекшым луктеш, сусырым эмла, корштымым лыпландара, пуалме ваштареш кучедалеш, шолын пашажым, аппетитым саемда. Мигрень, йыжыҥ корштымо, геморрой (вӱр йогымым чараш) полша. Холестериным иземда. Гепатит, холецистит да шоло, верге, шондыгалта пуалме, изи кислотностян гастрит годым кучылталтеш. Эше паразитым лукшо ик эн палыме кушкыл.
Пызлышудо лемым шокшо ванне але компресс семын подагрым, ревматизмым, тӱкалт сусыргымым, кокшам эмлаш кучылтыт. Тыгак лыгым пытара.
Эмлалташ манын, ик стакан шокшо вӱдыш изи совла пызлышудо пеледышым пыштыман, ик шагат шинчыктыман да шӱрыман. Ты лемым, кок-кум ганалан пайлен, ик кечыште йӱман. Кок арня тыге эмлалтман. Арня каналташ да уэш йӱаш тӱҥалаш лиеш.
Паразит деч утлаш манын, ныл ужаш пеледышым, кок ужаш гвоздикым да ик ужаш арымшудым порошок марте тыгыдемдыман. Тудым ӱй але кинде дене кочкаш лиеш.
Ӱй дене кочнеда гын, ты порошокым ушкал ӱй дене варыман (1:2 кугыт дене объёмым ончен). Ик изи совла дене кечеш кум гана яра пагареш, леве вӱдым подылын, кочмо деч пел шагат ончыч кочман. Тыге кум арня эмлалтман.
Кинде дене кочнеда гын, порошокым кечыште ик изи совлам веле кочман, тудым кок-кум ганалан пайлыман. Порошокым изирак кинде пӱчкышыш пӱтыралман да нелын колтыман. Изишак вӱдым подылаш але ик изи совла мӱй дене кочкаш лиеш. Тыге кужун эмлалташ лиеш.
Эмлалтме жапыште диетым кучыман, шылан, коян, сакыран, руан кочкыш нерген жаплан мондыман.
Шотыш налза. Пызлышудо дене мӱшкыран, чызе шӧр дене азам пукшышо ӱдырамашлан, йочалан эмлалташ ок лий. Молыланат кужун эмлалтман огыл, кушкыл изишак аяранлан шотлалтеш. Тыгак шекшкалташте кӱ (тарванен кертеш), тромбофлебит (вӱрым изишак нугыдемда) годым ок лий. Изишак давленийым нӧлталеш.