15 февральыште ача-авамын Геннадий Павлович ден Лидия Ивановна Павловмытын сӱан кечышт ыле. Нуно 52 ий ваш келшен, йöратен иленыт. А 16 февраль – авамын колымо кечыже. Тиде кечын кажне ийын ачам дене коктынат авам нерген омым ужына ыле.
Тиде ганат ӱстелым погышна, уштышна. 16 февральыште эрдене ачам, тыгай куаныше, мылам ойла: «Роза, таче аватым омем дене ужым. Пеш мотор шемалге-йошкарге тӱсан пальтом чиен, весела. Мый декем тольо да öндале, шокшын шупшале. Эше пеленже еҥ-влак ыльыч. Мыят аватым öндальым да шупшальым». Мый öрын колтышым да каласышым: «Ачай, тый черланет, очыни, тиде сай омо огыл вет».
Мален кынелмекыже, ачам йодеш: «Кызыт тый тыште коштыч мо?» «Уке, мый але тольым веле», – манам. «Тыште ош вургеман тыйын гайрак ӱдырамаш ыле, омсам почо да мый дечем йӱкын йодо: «Кто здесь Павлов?» «Я Павлов», – маньым. А тудо ӱдырамаш йомо, шулен кайыш.
Пеленже ала-кöмыт эше ыльыч, аламом пеш ыштышт. Кок пöръеҥым пеленже наҥгайыш», – каласкала ачам. Мый мом ойлашат öрынам, шинчажлан койын манын шоналтышым.
– Ачай, тыйым налашак толын огытыл чай? – йодам.
– Уке, эше илем, шкемым сайын шижам, черле омыл вет, – ачай воштылале.
– Ачай, ме тыйым чылан йöратена, тый мемнан аксакална улат, могай эше каяш, илаш да илаш кӱлеш, – манам.
– Эше иктаж кум ийжым илем, шонем, – каласыш.
«Но Лидам деке кайынем, 90 ий марте иленам вет» манын ойлымыжым вара шарналтышым. Тений У ий деч ончыч ачам шке омыжым ойлыш. Мыланем пеш кугу пöртыштö пачерым пуэныт, сравочым кучыктеныт. Пӧлемым ну кычал коштам. Ик замокыш керам – ок почылт, весыш керам – адакат ок почылт. Ноен пытышым. Ончем: Лида пелашем кӱшычын вола, ваштарешем толеш. Тыгай моторын чиен, мыйым ужо да сыренрак каласыш: «Геннадий, мом тыште кычалын коштат? Але пачерыштет ремонт кая. Але ямде огыл, кай тышеч!» Ачам помыжалт кая.
18 февральыште ачам кече мучко Марий Эл радиом колышто, телевизорым ончыш, «Марий Эл» ден «Кугарня» газет-влакым лудо, «Ончыко» журналымат шергал пытарыш. Сото телефон дене шукышт дене мутланыш. Верандыш пел шагатлан каналташ лекте. Кастене кас кочкышым ыштышна. Ачам пеш сай кумылан, куаныше ыле. Телефоныштыжо жапым шындаш йодо, кастене жапым ончалаш кӱлеш лиеш манын ойлыш. Пелашем вик ыштен пуыш.
– Ачай, малаш возаш полшаш мо? – йодым. – Уке, ок кӱл, малаш возам, тый кай ынде, – мане.
Умбакыже 5 мартыште лекше номерыштыже лудын кертыда. газетым тыгак сайтысе кевытыште налаш йӧн уло.
Р.АНТРОПОВА. Советский район, Ӧрша.