Пытартыш йыҥгырым вучат

Республикысе школлаште ты кечылаште пытартыш йыҥгыр йоҥгалтеш, тидын лӱмеш пайрем лиеш.

19 майыште Йошкар-Оласе 10-шо номеран школышто 11-ше классыште 30 да 9-ше класслаште тунемше 108 ӱдыр-рвезылан йоҥгалтын. Шуко вере тыгай кечым 20 майыште эртарат.

Выпускник-шамыч мо шотышто тургыжланат? Нунылан школлаште умбакыже тунемаш кайыме шотышто могай мероприятий-влак эртаралтыныт? Йоча-влак республикысе вузлашке тунемаш пурынешт але моло оласе вузым ойырен налыныт?

Елена Кондукова, Курыкмарий район Эмӓн школын туныктышыжо:

 

– Мыйын вуйлатыме 11-ше классыште 5 ӱдыр ден 6 рвезе тунемыт. Иктыже – мыйын ӱдырем.

Йоча-влак экзаменлан руш йылме да математике деч посна биологийым, обществознанийым, физикым, химийым, историйым да информатикым ойырен налыныт. Выпускной экзамен-шамычлан икымше ий огыл ямдылена, сандене опытна погынен. Туныктышо-шамыч консультацийым эртарат, тыгак тунемше-шамыч интернет-ресурслан эҥертен ямдылалтыт. Мо шотышто тургыжланена? Эн ончычак экзаменым кучымо процедурым кӱлеш семын шуктымо шотышто. Вет нине йоча-влак 9-ше классыште улмышт годым пандемийлан кӧра кугыжаныш экзаменым кучен огытыл, садлан изиш лӱдыкшырак. Туге гынат тений нуно пробный манме экзаменым сдатленыт.

Мемнан ӱдыр-рвезе-влак Йошкар-Олаш да Чебоксарыш тунемаш кайыме нерген шонкалат. Вет кажне ийын школышкына Марий кугыжаныш университет да Чебоксарысе вузла гычат агитаций да палдарыме шот дене толын коштыт. Тылеч посна выпускник-студент-влак дене вашлиймаш-влак эре лиедат. Нуно йоча-влаклан студент илышышт нерген каласкалат.

Фотом налме: yola.edu12.ru