Пелашем дене пачерыште илена. Шем пырысна уло, тудо пеш шыма, ниялткалымым йӧрата. Иктаж-кӧ омсам тӱкалта гын, иканаште омса дек кудал мия, оза дене пырля унам пуйто вашлиеш.
Ик эрдене йӱд смене деч вара мӧҥгӧ толын пурышым. Пелашем – пашаште, эргына – школышто. Кухньышто кочкын шинчем. Кенета омсам ала-кӧ чотак тӱкалтыш. Лӱдмем дене чытырналт кайышым. Пырысем тыманмеш омса дек кудале. Но ты гана ныл йолан йолташем, тупрӱдӧ тураште пунжым овартен, уло кертмын кычкыра, пуйто янлык дене кредалаш ямде. Омса дек миен, глазокыш ончальым – иктат уке. Ала иктаж йоча омсам чумалын, шоналтышым да омсам почаш тӱҥальым. Тиде жапыште пырыс кидышкем тӧрштыш да, кӱчшым керын, кидем пурльо. «Тый таче ораде лийынат мо?» – манам пырысемлан, шкеже кораҥ шогальым. А ныл йолан йолташем тугак омса воктене шинча, шинчаже йӱла веле.
Ванныйыште кидем мушкын шогышемла, омсаш адак тӱкалтышт. Пырыс адак магыраш тӱҥале. Тиде жапыште пелашем йыҥгыртыш. «Мом ыштет? Таче чонемлан нелын чучеш, пуйто ала-могай тургыжланымаш кӧргем нулта», – манеш тудо.
Эр кочкыш деч вара малаш возым. Тудо кечын пырысна воктечем ыш кораҥ, малашат воктекем возо. Такшым пелашемын йол мучаштыже гына мала ыле, кечывалым – эре креслыште. Шот дене маленат шым керт, кажне йӱкым шижам, ала-могай шучко омо-влак кончат.
Кастене мо лийме нерген пелашемлан каласкалышым. Тудыжо сортам чӱктыш да пачер мучко коштын савырныш. Тылеч вара шекланаш тӱҥальым: иктаж-куш кужу жаплан кайыме годым пырыснам пырля налына гын, тудо мемнан пачашыште верланыше ик пачер омса воктене пунжым оварта да сырен магыра. Ты пачерыште ынде шукертсек иктат ок иле.
С.Иванова. Йошкар-Ола.
Интернет гыч налме фото.