Ты кушкылым пырыс йӧрата, садланак тудлан тыгай лӱмым пуымо. Кушкыл лыпландара да пуалме ваштареш кучедалеш, шолын, шӱм ден вӱргорнын пашаштым саемда, иммунитетым пеҥгыдемда, паразитым пытара. Ӱдырамашлан пайдале.
Коваште чер годым пырыс пӱртньыкым (котовник кошачий), мирра кишым, вӱршудым, модо саскам, вербенам, куатшудым (девясил) икнаре гыч налман. 400 мл шокшо вӱдыш кум изи совла ты шудо вартышым пыштыман, пел шагат шинчыктыман да шӱрыман. Лемым 1/3 стакан дене кечеш кум гана йӱман.
Логар коршта гын, ик стакан шокшо вӱдыш кок изи совла пырыс пӱртньыкым пыштыман, петыртыш дене петырыман да ик шагат кучыман. Лемым шӱрыман да логарым шӱалтыман.
Невроз годым пырыс пӱртньыкым блендер дене порошок марте тыгыдемдыман. 30 г порошокым 280 мл шокшо вӱдыш пыштыман, иктаж-мо дене леведман, пел шагат кучыман да шӱрыман. Лемым 50 мл дене кечеш ныл-вич гана йӱман.
Кылмен черланымеке, ик литр вӱдыш 50 г пырыс пӱртньыкым пыштыман да вӱд пар ӱмбалне пел шагат кучыман. Пар ӱмбач кораҥдымеке, петыртыш дене петырыман да кок шагат кучыман. Лемым тыглай чай олмеш йӱман.
Кугу давлений годым 300 мл шокшо вӱдыш ик кугу совла пырыс пӱртньыкым пыштыман, петыртыш дене петырен, кум шагат шинчыктыман. Лемым шӱрыман да ик кугу совла дене кочмо деч пел шагат ончыч йӱман.