Республикысе 7-ше номеран исправительный колонийыште творческий кружокыш коштшо Анна Куропатина руаш дене сӱрет-аппликацийым ышта.
Колонийыште шинчыше-влакын канышт жапышт шукыжак огыл. Тудым пайдалын эртараш манын, колонийлаште тӱрлӧ занятийым эртарат. Нунын кокла гыч иктыже – творческий кружок. Тушто судитлалтше-влак кидпашам ыштат. Анна Куропатинат ты занятийлаш коштеш.
Ондак Анна ыштышаш материалым ямдыла, рамыш пижыкта да грунтоватла. Вара тушко сӱретын эскизшым чия дене сӱретла. Сӱрет кошкымо жапыште руашым нӧштылеш да кӱлеш кӱжгытан формым ышта. «Тыште ик секрет уло: шинчалым пыштыман. Тыге чия сайынрак пижеш», – манеш кидмастар.
Умбакыже леске да вурс линейке дене вермишель гай кужу ужаш-влакым пӱчкеда. Деталь-влак ынышт кошко манын, шуко огеш ыште. Вермишель изиш кошка гын, шонымо семын сӱретым ышташ йӧндымӧ.
Кӱлеш семын руашым сӱретыш оптымеке, Анна тудым акрил чия да лак дене ӱмбачын «леведеш». Тыгай сӱретым ямдылаш кок арня наре жап кӱлеш. Кажне гана руашын кошкымыжым да пижмыжым вучыман, а тиде писын огеш лий.
«Тыгай сӱретым ямдылаш кружокым вуйлатше Ирина Цветкова темлен. Тудак эскизым конден. Ты пашан оригиналжын авторжо – американ сӱретче Линда Николсон. Мый тӱрыснек кузе ыштыме методикыжым пален омыл, но мом ыштышашым умыленам», – ойлыш А.Куропатина.
Тиде кидпашам социал сетьыш лукмеке, ятыр еҥ шке шонымашыжым возен, акым пуэн, сандене сӱретлан лӱмым пуымо конкурсым эртараш шонымашышт лектын.
Шукерте огыл тиде конкурсым иктешленыт. Шуко вуймутым темленыт, но Йошкар-Ола гыч Ирина Казакова-Мартынцеван поснак ойыртемалтше лийын: «Мурррчащая вдаль…». Сеҥышылан сӱретын принтше дене футболкым кучыктеныт.
Чон-кумыл паша ӱдыр-влаклан илышвийым пуа.
УФСИН-ын архивше гыч налме фото-влак.