«Защитники Отечества» фондын Марий Элысе филиалже ден Марий Элысе Образований да науко министерстве пашам пырля ыштыме нерген ойпидышым кылденыт.
Фондын пӧлкажым вуйлатыше Р.Магсумовын палдарымыж почеш, ты ведомство дене кылым икымше кече гычак кучат. Самырык-шамычым военно-патриотический шӱлышеш куштымо, СВО участник-влакын ешыштлан тӱвыра да каныме мероприятийым ямдылыме, ветеран-шамычым у профессийлан туныктымо да паша верым мумо да моло йодышым пырля рашемдат.
– Ойпидыш кидпалым пыштыме дене пашам умбакыжат пырля ышташ пеҥгыдемдена, тӱҥ задачына – передовой гыч толшо-шамычлан тыглай илышым тӱҥалаш полшаш, – палемден Р.Магсумов.
«Защитники Отечества» фондын Марий Элысе филиалжын ВК-се лаштыкше гыч налме фото.