Шукерте огыл 2026 ийлан класс вуйлатыше-влакын форумыштын посолыштым ойыреныт.
Каласыман, ты форум Россий Минпросвещенийын полшымыж дене «Молодёжь и дети» нацпроект почеш эртаралтеш. Марий Эл гыч посол лӱмым Козьмодемьянск оласе С.Н.Сивков лӱмеш 3-шо №-ан школышто руш йылме ден литературым туныктышо Надежда Петрова сулен.
Туныктышо лияш пӱралтын
Надежда Вениаминовна образований аланыште 17 ий тырша. Курыкмарий район Копон ялын шочшыжо изинек руш йылме предметым йӧратен да шкенжым лач филолог пашаште веле ужын.
– Кугу тау Эмӓн кыдалаш школышто руш йылме ден литературым туныктышо Зинаида Амбросиевна Никитиналан. Тудо эше мыйын класс вуйлатышем лийын. Пеш виян педагог. Тудак филолог лияш кумылаҥден манын кертам. МарГУ-м тунем пытарымеке, паша верым шочмо районысо школлаште кычалынам да Ямангаш тӱҥ школыш туныкташ толынам. Кум ий гыч паша гыч каенам да Йошкар-Олаште ик организацийыште рекламе аланыште шкемым тергенам. Но лектыш лийын огыл. Тугеже туныктышо лияш пӱралтынак, шоналтенам да образований аланыш угыч пӧртылынам. Кызыт Козьмодемьянскыште илем да тысе 3-шо №-ан школышто пашам йӧратен ыштем.
Ответственный паша
Н.Петрова 2022 ийыште класс вуйлатыше-влакын очный форумышкыжо отборым эртен. Лач тунам туныктышын мер илышыш корныжо тӱҥалын. Чолгалыкшым чыла аланыште ончыктен: конкурслаш, проектлаш ушнен, коллеге-влак дене вашлийын. Шке пашажым путырак йӧраташ тӱҥалын.
– Форумын посолжо лӱмым мыняр класс вуйлатыше налаш тыршен, мый пален омыл, кызытат ом пале. Но жюри шкемын пашам чын да чон йӱлен ыштымем ужын, шонем. Видеособеседований лийын. Тунам чот тургыжланенам ыле. Шкемын ыштыме пашам вес туныктышын деч кӱкшын ом акле. Моло семынак тыршем. Лач образований аланыште мо ышталтмым, вашталтыш-влакым тӱткын эскерем. Тунемшем-влак занятийлаште нигунам яра огыт шинче. Тунемме деч посна нуно тӱрлӧ шӧрыныштӧ шкеныштым шуарат, – ойла Надежда Вениаминовна.
Туныктышын мутшо почеш посол-шамычончылно оҥай задаче-влак шогат.
– Мый, Марий Элысе педагог-влакым иктыш ушен, нунылан профессионал семын кушкашышт полшышаш улам. Мероприятийлам эртараш, просветительский проект-влакым виктараш вуйын шогем. Чыла тидым шукташ манын, посол чолга, поро кумылан, умылен моштышо, лӱддымӧ лийшаш. Козьмодемьянскыште уста туныктышо-влакын клубыштым почаш шонем. Икымше вашлиймашна 18 февральыште эрта.
Класс вуйлатыше-влакын форумышт тӱрлӧ проектым илышыш пурта. Мутлан, 18 январь гыч 31 май йотке Российысе калык-влакын икоян улмо идалыклан пӧлеклалтше онлайн-экспедицийым эртара. Тиде проект веле огыл, а культур-влакын диалогышт. Тунемше-влак дене пырля кандаш федеральный округыш да лишыл йотэллаш виртуальный путешествийыш лектына: историйым пален налына, тӱрлӧ кидпашам ыштена, мурым мурена, Российын картыжым шке кид дене погена, телекӱвар, квиз да моло модышла дене модына. Ты онлайн-экспедиций калык-влак коклаште келшымашым, пагалымашым да ваш умылымашым пеҥгыдемдымаш шонымаш дене эртаралтеш, – палдарыш посол.
Посол – форумын «шӱргыжӧ». Тудо класс вуйлатыше-влакын шонымашыштым образований аланыште илышыш пурташ тыршышаш. Пырля ушнен, сай да кӱлешан пашам ышташ лиеш. Надежда Вениаминовна идалык мучко шкенжын профессионализмжым пеҥгыдемда веле шонена.
Н.Петрован альбомжо гыч налме фото.