Марий кундемнан тӱрлӧ районыштыжо СВО-што улшо-влаклан полшат. Оксам погат, тӱрлӧ кӱлешан арверым налыт, маскировочный сеткым пидыт.
Марий Турекыште
Марий Турек районышто маскировочный сеткым тӱрлӧ ялыште пидыт.
Сардаял калыкат кодшо арнян ты пашашке ушнен, нуно кок сеткым пидыныт, августышто уэш тӱҥалшаш улыт.
Сеткым пидаш клубыш погынат. Тушко кугыеҥ-влак дене пырля йоча-влакат полшаш толыт. Пашан кузе шукталтмыж нерген Сардаял клубым вуйлатыше Валентина Чернова тыгерак мане:
– Маскировочный сеткым Кугу Карлыганыште талын пидыт. Ты пашам ты кундем гыч самырык пӧръеҥ, слесарь Тахир Якупов виктарен шога. Полшаш йодо, ме келшышна. Маскировочный сеткым туштак пидаш тунемынна, видеошко войзышна. Материалым Кугу Карлыган гыч тудо колта.
Сардаял калыкым ты пашаш ушаш манын, шкенан ялысе группыш возышна, пидаш толаш ӱжна. Икымше кечын еҥ-влак шагалынрак ыльыч, вес кечынже погынаш тӱҥальыч.
Пидаш неле огыл. Тӱҥалтыште гына изиш йӧсырак чучо. Варажым тунемалте да кид шкеак каяш тӱҥале. Тыште чылалан паша уло. Икте тасмам пӱчкеда, весе пӱтыра, кумшо пидеш. Ме кок кечыште кок сеткым ыштен шуктышна. Кумшылан материал ситен огыл.
Пидме годым, марий салтак-влак сайын, таза пӧртылышт манын, Юмылан пелештена.
Ял калык ты пашам куштылемдаш полша. Вет шке гына тидым ыштен огына сеҥе ыле.
Сардаял гыч спецоперацийыш кайыше-влак улыт. Сандене, оксам поген, тӱрлӧ сатум наледен, посылкым колтенна. Кодшо гана тӱрлӧ печеньым, чайым, носким да моло арверым налынна ыле.
Арбор кундемыштат 4-7 июльышто маскировочный сеткым пидыныт. Ты пашашке изижге-кугужге кумылан кажне еҥ ушнен. Тидын нерген Арбор клубым вуйлатыше Наталья Прохорова каласкалыш. Тудын мутшо почеш, ты пашам Арбор клубышто кечывалым да кастене шуктымо. Чылаже 10 сеткым пидме. Материалым
Кугу Карлыган кундем гычак Тахир Якупов ойырен. Августышто уэш пидаш тӱҥалшаш улыт. Тидлан материалым гына вучат.
Провой велне
Звенигово район Какшамарий ял шотан илем гычат гуманитарный полышым чӱчкыдын колтат. Тидын нерген ял шотан илем администрацийым вуйлатыше Елена Майорова дене мутланышна.
Какшамарий селаште шочын-кушшо Елена Петровна тыште 17 ий пашам ышта. Тӱҥ бухгалтерлан шуко ий тыршен, пытартыш ныл ийыште тудо ял шотан илем администрацийым вуйлата.
Ты кундемыште еҥ-влак поро пашаш кумылын ушнат. Мобилизацийым увертарымекак, калык деч оксам погаш тӱҥалме. А февральыште да мартыште еҥ-влак 720 наре блиндажный сортам ыштеныт.
– Какшамарий ял шотан илем гыч 13 рвезе мобилизацийыш логалын, эше коктын шке кумылын каеныт. Оксам шым гана, 200 тӱжем наре теҥгем, погенна. Пытартыш гана – 56 тӱжем теҥгем. Тудым кодшо арнян Звенигово оласе Элнам аралыше-влакын еш комитетышкышт наҥгаенна. Тушто СВО-што улшо-влак дене кылышт пеҥгыде. Нуно ты окса дене мо кӱлешым шкеак налыт да колтат.
Погымо окса дене ме кок гана кӱлешан арверым, кочкыш сатум, чоҥымо материалым (мутлан, товарым, пилам, чӧгытым) да молымат налынна, чыла тидым Звенигово оласе добровольческий рӱдерыш колтенна.
Мобилизаций тӱҥалмеке, еҥ-влак деч оксам поген, рацийым, наколенникым, газ балоным да моло кӱлешан арверым налынна. Чыла тидым Ульяновскыш шкеак наҥгаен пуэнам ыле.
Блиндажный сортам ышташ шукын ушненыт. Тидлан ме тушонко, пучымыш деч кодшо, тыгак у кӱртньӧ банке-влакым кучылтынна. 100 кило парафиным, 100 кило шыштым налынна. Чыла тидым банкылашке оптеденна да Йошкар-Олашке «Сердце матери» волонтёр организацийыш колтенна.
Кундемыштына газым але пуртымо огыл, пу дене олтена. Мобилизацийыш логалше ныл ешлан арендатор 7 кубометр дене пырням конден пуэн, – мане Е.Майорова.
СВО гыч пӧръеҥ-влак илыше да таза пӧртылышт манын, мо кӱлешым ышташ ямде улыт. Тидыже кызыт моткоч кӱлешан.