Шукерте огыл Марий кугыжаныш университет 10-11-ше класслаште тунемше-влаклан А.С.Пушкинын шочмыжлан 225 ий темме лӱмеш «Дипломатия на службе мира» IX тӱнямбал эссе конкурсым эртарен. Тышке 142 паша пурен.
Нуным жюри «Антиплагиат» программе дене терген. Тылеч вара чыла пашажымак конкурсыш пуртымо огыл.
«Моткоч шуко эссе Беларусь Республик гыч толын. Тусо ӱдыр-рвезе-влак шке элыштын, Российын, шочмо вершӧрын историйыштым моткоч сайын палат! Нунын каласкалыме историйышт гыч ме Беларусь кундемыште оккупаций годым тыглай еҥ-влакын илышыштым да у деч у факт-влакым пален налына», – мане жюри член, филологий науко кандидат, культур кокласе коммуникаций кафедрын доцентше Татьяна Янцукова.
Икымше темым А.Пушкинын произведенийже гыч «Гордиться славою своих предков не только можно, но и должно» цитате дене лӱмдымӧ. Тушто 1-ше вер дене куд еҥым палемдыме. Нунын коклаште – Козьмодемьянскысе «Дарование» школ-интернат гыч Валерия Никитина.
Вес темылан лӱмым А.Пушкинын «К Чаадаеву» произведенийже гоч ужашым налме: «Пока свободою горим, пока сердца для чести живы, мой друг, Отчизне посвятим души прекрасные порывы!» А тыште лу тунемшылан икымше вер логалын. Ты радамыште Кужэҥер посёлкысо 2-шо номеран школышто тунемше Егор Петуховат уло. Тудын пашаже, чынжымак, ойыртемалтше. Рвезе палыме руш кугу поэт Александр Пушкин дене мутланыме сынан сочиненийым возен. Тыгай жанрым ойырен налмыж шотышто рашемдышна.
– Мутат уке, сочиненийым возымаште авам Любовь Валентиновна кугун полшен. Тудак школыштына руш йылмым да литературым ынде 20 утла ий туныкта. Авам мыйын сомылем виктара, кузе ышташ лийме нерген каласкала, а мый материалым чумырем да варажым возем, – каласыш Егор.
Тений рвезе 11-ше классым тунем пытара. Ончыкылык профессийым коктеланыде ойлен кертеш. Тудо МарГУ-шко тунемаш пураш да тӱҥалтыш класслам туныктышо лийнеже.
Е.Петухов тӱрлӧ педагогический олимпиадыште, сочинений, видео-эссе да конкурслаштат участвоватлен. Тушто призовой верымат ятыр гана налын. Тыште туныктышо-аважын надырже кугу.
Ачаж дечат Егор шкаланже шинчымашым налын. Александр Петрович тиде школыштак информатикым туныкта. Егор компьютерым сайын пала, интернетыште ятыр тӱшкам ыштен, нуным вӱда. Тыгак тиддене оксамат ыштен налаш тунемын.
Но кызытеш ойырен налме корно дене ончыко кайынеже. Ме выпускниклан тиде шонымашышкыже шуаш тыланена.
Эльвира Терентьева.
Фотом еш альбом гыч налме.