16 июньышто «Лучший вальщик леса» лӱмым налме верч Марий Элыште республикысе профессиональный мастарлык конкурс лийын. Тудым Марий Эл Республикысе Пӱртӱс поянлык, экологий, йырым-йырысе средам аралыме министерстве ден Волгатех эртареныт.
Конкурсышто Марий Эл, Татарстан, Чуваший республикла, Киров, Брянск, Угарман кундемла, Кемерово да Моско олала гыч 28 участник таҥасен. Нунын радамыште чодыра озанлыкысе пашаеҥ, арендатор, тыгак студент-влак лийыныт.
Марий кундемыште тыгай конкурсым 2016 ий годсек эртарат. Ӱмаште Брянск, Калининград, Угарман кундемла, Татарстан, Карелий да Чуваший республикла гыч толшо-влак профессиональный мастарлыкыштым ончыктеныт. Тыгай конкурс чодыра пашаеҥлан, тыгак ты специальность дене тунемше студент-влаклан мастарлыкым нӧлташ да опытым погаш кугун полша.
Тений конкурсын икымше йыжыҥже Чернушкинский чодыра участкыште эртен. Тушто пушеҥгым бензопила дене пӱчкыныт. Кокымшо йыжыҥыште Йошкар-Оласе Ий полат воктене участник-влак бензопила дене тӱрлӧ заданийым шуктеныт, тыгак команде дене таҥасеныт. Мутлан, укшлам пӱчкеденыт, цепьым вашталтеныт да молат.
Чебоксар гыч – Йошкар-Олашке
Марий чодыра озанлык техникумышто 3-шо курсышто тунемше Никита Сурин ден 2-шо курсышто тунемше Константин Афанасьев конкурсыш кумылын ушненыт. Нуно юниор тӱшкаште ойыртемалтыныт. Никита Сурин тыршен тунемеш, тыгодым техникумын чапшым команде дене тӱрлӧ конкурсышто нӧлта. Ӱмаште команде дене чодырасе многоборьеште 1-ше вер дене палемдалтыныт. Тений рвезе «Молодые профессионалы» конкурсышто 1-ше верым налын. 4-9 июльышто тудо Хабаровск олашке таҥасаш кая.
Пушеҥгым йӧрыктымӧ конкурсыш Никита ынде кокымшо ий ушна. Ӱмаште посна вер дене палемдалтын огыл гын, тений «Пушеҥгым эн сайын йӧрыктышӧ» семын 1-ше степенян дипломым сулен.
– Чодыра пашаеҥ лияш манын, 9-ше класс деч вара Чебоксар гыч Йошкар-Олашке тунемаш тольым. Мемнан дене чодыра пешыже уке. Тендан велне чодыра озанлык вияҥ толеш.
Чаманаш логалеш, кызыт самырык еҥ-влак чодыра пашаеҥ лияш кумылан огытыл. Сандене группышто улыжат ныл студент гына улына. Мый пӱртӱсым моткоч йӧратем. Ойырен налме профессий мыланем лишыл, тыште тунемаш келша. Сай специалист лияш да Марий Элыште пашам ышташ кодаш шонем.
А ты конкурс оҥай да моткоч кӱлешан. Ӱмашсе дене таҥастарымаште тений изиш шагалрак еҥ погынен. Мо кумылым волтен: игече шокшо ыле. Тидыже пашаште изиш чаракым ыштен, – мане Н.Сурин.
Никита – весела, мыскарам ышташ йӧратыше да тыгодым уста кидан рвезе. Чодыра пашам сайын пала, практикыште тидым устан кучылтеш. Яра жапше годым тудо книгам лудеш, йолташыже-влак дене уремыш лектеш.
Ачажын корныжым тошка
Константин Афанасьев Килемар районысо Кӹмья селаште шочын-кушкын. Изинек пӱртӱсым, чодырам йӧрата. Ачаж гаяк чодыра пашаеҥ лияш шонен, 9-ше класс деч вара Йошкар-Олашке Марий чодыра озанлык техникумыш тунемаш толын. Никита семынак тудат техникумышто чолгалыкым ончыкта. Ӱмаште техникумысо команде дене чодырасе многоборьеште таҥасен, тений «Молодые профессионалы» конкурсышто 2-шо верым налын. А тиде конкурсыш тудо икымше гана ушнен. Никита «Укшлам пӱчкедыме» номинацийыште 2-шо верым, «Точная раскряжевка» номинацийыште 3-шо верым налын.
– Студент пагытем веселан да тыгодым писын эрта. Группыштына индеш студент улына. Тунемаш мылам неле огыл, тыште келша. Кок ийыште пушеҥгым йӧрыкташ, пилам писын погаш да рончаш, бензопила дене сайын пашам ышташ тунем шуынам.
Конкурсыш шукыжым кугурак ийготан-влак погыненыт ыле. Юниор тӱшкаште ныл рвезе гына лийынна. Мутат уке, чодыраште изиш тургыжланенам ыле. Сандене пушеҥгым йоҥылышрак пӱчкын колтенам. Тиде конкурс опытым погаш сайын полша, – мане К.Афанасьев.
Константин – тыршыше, тыматле студент. Тудо колым кучаш, сонарлаш йӧрата. Тыгак уста кидан рвезе машинам ачален мошта. Кызыт тудо машинам виктараш тунемеш.
Тиде кок рвезын усталыкшым, мастарлыкшым ончен куанет. Коктынат моткоч самырык улыт гынат, тыге сайын пушеҥгым йӧрыктен, пӱчкеден моштат – ӧрат веле! Ончыкылан нуно сай чодыра пашаеҥ лийыт манын ӱшанем.
А конкурсышто нуно поснак ойыртемалтыныт. Тидыже сай паша верым куштылгын муаш полша. Сандене эре тыгаяк тале да чолга лийза!