«ЮГРАСЕ ПУШ» («Югорские обласы»)
Тыгай лӱман этноспорт фестиваль 29-30 июньышто Ханты-Мансийск олаште эртаралтын.
Тӱҥ мероприятийже – ХМАО-со губернаторын кубокшо верч облас манме пуш дене ийын ӱчашымаш. Фестивальыш 200 утла участник 13 эл гыч толын. А ийын коштмашым ончаш 3100 еҥ миен. Байбалак эҥер серыште ятыр жап весела йӱк-йӱан шоктен. Тиде таҥасымаш гына огыл, а тӱвыра пайрем. Толшо-влак Йӱдвелысе тӱп калык нерген пален налыныт, чумыш пурен онченыт, арт-объектла воктене сниматлалтыныт. Кидпаша шотышто мастер-класс-влак эртаралтыныт. Пуш дене таҥасыше коклаште эн изиже 11 ияш, эн кугужо 75 ияш лийыныт.