Шокшо игече годым шукын вӱд воктене жапым эртарена. Тыгодым лӱдыкшыдымылык правил нерген южгунам мондена. А тиде азап марте шуктен кертеш – вӱдыштӧ ятыр еҥын ӱмыржӧ лугыч лийын.
Еҥ-влак йӱшывуя йӱштылаш келыштарыдыме верлаште йӱштылыт але вӱдыш пурат, вӱдыштӧ лӱдыкшыдымылык правилым шотыш огыт нал, пуреҥгайыше еҥлан икымше полышым пуэн огыт мошто – чыла тиде айдемым колымаш марте шуктен кертеш.
Тыгай годым теве мом шотыш налман:
– «Йӱштылаш ок лий» манын возыман щит уло гын, вӱдыш ӥӱштылаш пурыман огыл;
– палыдыме, йӱштылаш келыштарыдыме верлаште ида йӱштыл;
– буй-влак деч торашке ийын кайыман огыл;
– моторан, парусан судно-влак, тыгак пуш да ийын коштшо моло средстве дек чак ида мий;
– катер, пуш, причал да йӧнештарыдыме сооруженийла гыч вӱдыш тӧрштылман огыл;
– вӱдыштӧ йоча воктеч кораҥман огыл да тудлан лӱмын жилетым але нарукавникым чиктыман;
– вӱд воктене кочывӱдым йӱман да йӱшывуя йӱштылаш пурыман огыл;
– пийым да моло янлыкым вӱд воктек кондаш ок лий;
– сер воктене да кудашын-чийыме верлаште кагаз, янда да моло шӱкым ида кодо;
– мече дене лӱмын келыштарыме верыште гына модаш лиеш, вӱд йымалне ийме годым йӱштылшӧ вес еҥым вӱд йымалне кучен лӱдыктыман огыл;
– пуреҥгаем манын, шоям ыштен, моло-влак деч полышым йодын кычкырыман огыл;
– оҥа, пырня, автомашина камер, пуэн овартыме матрас ӱмбалне ийын коштман огыл.
Вӱдыштӧ иктаж-кӧ азапыш логалын гын, «112» номер дене иканаште йыҥгыртыза да икымше полышым пуыза.
Воктене улшо еҥ пуреҥгаяш тӱҥалын, а утарыше-влак эше толын шуын огытыл гын, нине правил-влакым шотыш налза:
– пуреҥгаяш тӱҥалше еҥ дек шеҥгечын ийын толза. Тидым ышташ ок лий гын, вӱд йымак пурен, шола кидда дене тудын пурла пулвуйжым йымач кучыза, а пурла кидда дене шола пулвуйжо гыч ончычла уло вийда дене шӱкалза да тудым шке дек туп дене савыралза;
– пуреҥгаяш тӱҥалше еҥым пурла коҥыла йымачше пеҥгыдын кучыза да вӱд ӱмбак ийын лекса;
– сер дек ийын лекташ полшыза.
Сер дек ийын лекташ икмыняр йӧн уло:
– азапыш логалше еҥым кок кидда дене оҥылашыж гыч кучыза, а шкеже, йол дене чумедылын, туп дене ийза;
– ик кидда дене еҥым коҥыла йымачше ӧндалза да оҥылашыжым кучыза. Уке гын, умшашкыже вӱд пурен кертеш. Шкеже вес кидда дене ийын лекса;
– пуреҥгаяш тӱҥалше еҥ торешлана гын, шеҥгечынже ик кидда дене коҥылайымач ӧндалза да вес кидшым кынервуйжо деч кӱшкыла кучыза. Шкеже, яра кидда дене ийын, сер дек лекса.
МЧС-ын Марий Элысе управленийжын полшымыж дене ямдылыме.
Интернет гыч налме фото.