Шыжым кече кӱчыкемме дене чыве-влакын пунышт йогаш тӱҥалеш. Тыге сурткайык телылан ямдылалтеш: тошто пуным улан алмашта. Тыгай годым чывылан кузе полшаш лиеш? Йӱштӧ телым сайын эртарыже манын, мом ыштыман? Тидым Марий Элысе вольык, янлык чер ваштареш кучедалме станцийым вуйлатыше Владимир Данилов умылтара.
Сай кочкыш кӱлеш
Южо чывын пунжо шыже тӱҥалтыштак йога, а южын – телылан лишкырак. Самырык чыве икымше ийын пуным йоктарыдеат кертеш. Пун йогымо жап икмыняр арня гыч икмыняр тылзе марте шуйна. Тидыже тыгак лийшаш.
Пун йогымо жапыште чыве эркынрак тарванылеш, утларак шинча, но чара вержым темдаш ок тырше. Садлан тыгай годым тудлан яндар шартыш (подстилке) кӱлеш, кидыш налман огыл, уке гын чара вержым сусырташ лиеш.
Чывын аппетитше йомеш. Кекырекше ден согаже иземыт да ошалгат. Тидыже чывын вашке мунчымым чарнымыж нергенат ойла.
Мом пукшаш?
Пуным йоктарыме жапыште чыве питательный веществам йомдара. У пун вашкерак кушшо манын, тудлан белокан кочкыш утларак кӱлеш. Чывын тыглай кочкышыштыжо 16 процентше белок лийшаш гын, пун йогымо жапыште 20 процент марте шукемдыман. Кочкышым кенета вашталтыман огыл, ум изин дене ешарыман. Кенета пукшымымат чарныман огыл.
Пун йогымо жапыште чыве-влак муныштым чӱҥгат. Тыге ынже лий манын, коклан муным шолтен пукшаш лиеш.
Шолтымо кол – белоклан да омега-3 ӱйлан пайдале кочкыш. Но тудым чӱчкыдын пуыман огыл, лач пун йогымо жапыште гына. Чот белокан кочкышлан кӧра сурткайык ӧрда.
Кечшудо белок деч посна метионинлан поян, тудо пунлан кушкаш полша.
Нерештарыме пырчым арнялан кок гана пуаш лиеш, тушто питательный вещества тыглай пырчысе деч шукырак.
Пурсам лӧчыктарен пуаш пайдале.
Чыве шке пунжым чӱҥга гын, лӱдман огыл, пунышто белок шуко.
А телым, йӱштӧ годым, чывым кузе ончаш? Тудым уремыш лукман мо? Муно кылма гын, тудым кочкаш лиеш мо? Туддене мом ышташ? Тидым 19 ноябрьыште лекше газетыште лудса.Кевыт