Кажне гаяк возымаштем интернетын юзо вийже нерген палемдем. А кузе тидын деч посна ХI курымышто? Черетан герой дене адак интернет эҥыремышвотышто палыме лийынна. Кеч илышыштат варажым ужынна гынат, утларакшым садак «сетьыштак мутланена».
Антон ден Дина Петровмыт дене 2021 ийыште йолташ лийынам. Тунам марий сынан брелокышт мыйын чонем савырен, сандене вигак визытым ышташ йодынам. Тылеч посна мелнам савыркалаш пу ӱзгарымат, алгамат налынам. Эсогыл вара Фея-кресава лӱмым мыланем пуэныт.
– Антон, кузе тиде пашалан кумылаҥында?
– Столяр пашам йӧратымаш, очыни, мыйын вӱрыштак лийын. Шке жапшым вучен илен улмаш. Кочам Виталий Николаевич Смольников Политехыште (кызыт – Волгатех) деревообработко факультетын деканже лийын. А ынде мый пу дене пашам ыштем. Ончыкыжым йоча-влакланат тиде пашам ончыктымо шуэш. Но кокымшо эргына шочмеке, яра жап шагалрак, сандене станокым шуэн чӱктем. Кугурак лиймекыже, когыньыштымат столяр пашалан туныктем. Тиде вӱрыштынак уло! Умбакыжат тиде тукым гыч тукымыш вончышаш!
2016 ийыште эпоксидный киш дене ыштыме ӱстелын фотожым ужынам. Тиде паша мыланем оҥайын чучын, сандене ыштен ончымо шуын. Ондак ик форматым ыштенам, вара – весым. Кӱлеш ӱзгар да келыштарыме вер укелан кӧра паша нелын каен.
Икымше «пробовлакым» пачерыштак ышташ логалын, ик пӧлемым мастерскойлан ойыренам. Вуйышто шуко шонымаш пӧрдын, а кид эре ала-мом ышташ йодын. Садлан ик жап гыч гаражым тӧрленам, ӱзгар ден верстак-шамычым келшышын вераҥденам. Яра жапым эре гаяк тушто эртаренам. Пу гыч тӱрлӧ ӱзгарым пӱчкеден луктынам: карандашым опташ атым, шкатулкым, тумбычкым, ӱстембалым да молымат. Ондак шканем гына ыштенам гын, вара палыме да родо-влакат йодын толыныт. Умбакыжым кид дене веле огыл, а механизм полшымо денат пашам ыштен ончымо шуын. Тыге ЧПУ станокым (числовое программное управление) налме. Тудо шулдыжак огыл, 25 тӱжем теҥге, но налмемлан ик ганат ӧкынен омыл. Тыгай станок кажне кечын пӱчкеден лукшашлык аппарат огыл. Тыге тудо вашке чыгынен кертеш. ЧПУ станокым налмеке, алгам ышташ тӱҥалынам. Тыгак пелашем дене коктын соцсетьыште лаштыкым вӱдаш пижынна. Мыланна оксажат тунар кӱлын огыл, калыклан тиде келша але укем пален налнена ыле.
– Марий сынан брелок-влакым кузе ышташ тӱҥалында?
– Икана оньыкувам марий тамган брелокым ышташ йодын. Йыргешкым, кече орнаментаным ыштен пуэнам. Тиде арверын фотожым интернет лаштыкышкына вераҥденна. Тунам тиде брелок чот кугу йодмашан лийын. Эсогыл икмыняр экземплярым Сахалинышкат колтенна.
– Ик брелокым ышташ мыняр жап кая?
– Кокла шот дене ик тыгай брелокым ямдылаш шагат утла жап кӱлеш. Станокын пӱчкын лукмекыже, тудым шлифоватлаш да чиялташ кӱлеш. Шотыш кондымо паша кужунрак шуйна. Южгунамже, иктаж экшыкым ужам гын, уэш ыштем. Брелок-влакым шӧрва дене ыштенна. Моло арверлан шӧрвам, тумым, фанерым, мореный тумым, йошкар пушеҥгым кучылтына.
– Тиде аланыш куснаш шонышо-влаклан могай тыланымашда лиеш?
– Кӧ пу гыч арверым ышташ кумылан гын, молын пашаштым утларак ончаш тыланем. Кызыт интернет сандалыкыште мо гына уке. Мутлан, мый иктаж мастарын чапле пашажым ужамат, шкежат ышташ кумылаҥам. Тыгодым лӱдыкшыдымылык правил нергенат мондымат огыл, электротехнике йоҥылышым ок йӧрате.
Фото-влакым А.Петровын альбомжо гыч налме.