Тений 16 майлан республикысе медорганизацийлаш пудий пурлмылан кӧра 172 еҥ полышым йодын толын, нунын коклаште – 14 ий деч изирак 71 йоча (ӱмаште тыгаяк жаплан 451 еҥлан полыш кӱлын).
Тергымеке, 64 пудий бореллиозан лийын. Пудий энцефалит вирусын антигенжым мумо огыл. Марий Элысе гигиене да эпидемиологий рӱдерын вирусологический лабораторийыштыже (Йошкар-Ола, Машиностроителей урем, 121, телефон: 73-06-72) пурлшо пудийым тергат.
16 майлан 906 еҥлан прививкым ыштыме. Вакцинацийыш илыме вер почеш поликлиникыш кайыман.
Пудий деч аралалташ манын…
– Чодыраш, паркыш, дачыш кайыме годым ошалге тӱсан вургемым чийыза –насекомый вашкерак шинчалан перна.
– Йолаш шулшым носкиш чыкыман, кужу шокшан тувырым чийыман.
– Кужу ӱпым шовыч йымак шылтыман.
– Пудий деч аралыше аэрозольный препарат-влак дене пайдаланыза.
– Чара кид дене пудийым ида кучо! Вургем гыч насекомыйым пинцет, кок паҥга, перчатке дене кораҥдыман.
– Пӱртӱсыштӧ каныме годым кукшырак, ошман верым ойырыза. Шудышто ида шинче.