26 мартыште Звенигово-Шолэҥер-Морко кугорнын 38-ше километрыштыже вӱдым колтышо пуч шелын.
Шокшо иегече кенета толмылан пуч кугу вӱдшорым колтен кертын огыл, асфальт шелышталт лекташ тӱҥалын. Тунам корнысо ты участкыште вӱдым колташ асфальтым кораҥдаш логалын. Сандене Морко районысо тиде кугорным петырыме.
Ты верыште кече да йӱд мучко 13 технике ден 21 пашаеҥ пашам ыштен. Машина-влаклан Памар – Кокласола ден Суслоҥгер – Выльыпсола кугорно дене кудалышташ темленыт ыле. 27 март кастене корным почмо, светофорым шогалтыме – ынде ревирсивный движений дене кудалаш лиеш.