Тений 10 март йотке Байкал ерысе Ольхон отрошто «Olkhon Ice Fest» ий скульптур парк пашам ыштен. Тушто ятыр кидмастарын ий гыч ыштыме композицийже-влак ончыкталтыныт. Морко марий рвезе Денис Афанасьевын пашажымат ужаш лийын.
Кочаже туныктен
Денис Ямбатыр ялыште шочын. Рвезе усталык шӱлышан кушкын, пу гыч тӱрлым пӱчкедаш йӧратен.
– Арсений Антипович Гаврилов кочам пелен изинек шӱдырнылынам. Тудак мыйым пу дене пашам ышташ туныктен. Кочамын шке мастерскойжо лийын. Тушто тудо издерым, окна сергам ыштылын. Токарный станок дене кузежым-можым мылам ончыктен, – ойла Д.Афанасьев.
Усталыклан шӱман улмыжо Денисым Йошкар-Оласе национальный президентский сымыктыш школыш конден. Тунемме программе почеш эн чотшо пум пӱчкедымаш чонжылан лишыл лийын.
Тӱнямбал фестиваль
Ӱмаште Д.Афанасьев 9-ше классым тунем пытарен да Моско областьысе Богородское посёлкысо пум художественный пӱчкедымаш шотышто институтыш тунемаш пурен. Икымше курсын студентше тений тӱнямбал ий фестивальыште участвоватлен. Тыгай кӱкшытан мероприятийыште тудо икымше гана лийын. Палемден кодыман: «Olkhon Ice Fest» фестивальыште Российын, Китайын да Беларусь Республикын эн уста скульпторжо-влак мастарлыкыштым ончыктеныт. Марий эргылан тушто лияш – чап.
– Кугу таум палыме мастаръеҥ, спидкарвинг дене тӱнямбал чемпион, мыйын наставникем Владимир Николаевич Алмановлан ойлем. Тудын темлымыж почеш Байкал ерысе Ольхон отрош логалынам. Владимир Николаевич дене кум ий палыме улам. Тудо паркысе пу скульптурым пӱчкедыме шотышто ятыр каҥашым, идейым пуэн, – манеш Денис.
Д.Афанасьев йӧн лиеш гын, вес ганат тыгай фестивальыш ушнаш шона.
– Тиде кугу опыт. Фестиваль сай шарнымашым веле коден. Байкал ерыште кава моткоч мотор, кече шичме годым поснак сылне. Тура кӱ курыкыш толкын толмым ончен шер ок тем. А Байкал ий ӱмбалне коштмо годым чон куштылгылыкым да эрыкым шижеш.
Ий дене пашам ышташ мылам келшен. Пу семынак ийын шке койышыжо уло. Тудым шижын да умылен моштыман, – каласыш самырык скульптор.
Писте – эн сае
Денис ӱзгар дене пашам ыштымыж годым, нелын огыл, но ятыр гана сусырген. Тӱрлӧ пушеҥге дене пашам ыштен мошта. Но эн сайлан да куштылгылан пистым шотла.
– Нӧргӧ пистым товар дене руаш да стамеске дене пӱчкедаш йӧнанрак. Шуко пашам писте гыч пӱчкедыме. Икымше пу скульптурем – кум имне. Тудым ужалыме. Эн кугу пашам – чодыра орол скульптур, – ойла Д.Афанасьев.
Тунемме деч посна студент, жапше уло гын, заказ почеш пум пӱчкеда. Тидын дене мастарлыкшым нӧлта, тыгак оксам ыштен налеш.