20-23 октябрьыште Москошто лийше «Абилимпикс-2023» национальный чемпионатыш Российын 76 регионжо гыч начар тазалыкан еҥ-влак ушненыт.
Марий Эл гыч участник-влак 9 компетенцийыште мастарлыкыштым ончыктеныт.
Икымше кечынак Марий Турек район Косолап школ-интернатын воспитанникше Артур Попов «Пу дене пӱчкедымаш» компетенцийыште тунемше-влак коклаште шӧртньӧ медальым налын.
Варажымат тиде компетенций сеҥымашым конден. «Специалисты» категорийыште Виктор Фёдоров кумшо верыш лектын. «Студенты» категорийыштат Станислав Васильев кумшо верым сулен.
Кокымшо кечынат шӧртньӧ медаль дене Удан колшо обществын Марий Элысе пӧлкажын еҥже Дмитрий Корнишин куандарен. Тудо «Йолчиемым олмыктымаш» компетенцийыште «Специалисты» категорийыште таҥасен.
А Наталья Перминова-Смоленцева «Визаж» компетенцийыште специалист-влак коклаште той призёр лийын.
Тылеч посна «Специалисты» категорийыште эше ик ший медаль уло: Татьяна Рыбакова «Документационное обеспечение управления и архивоведение» компетенцийыште ойыртемалтын. Тыгак ты чемпионат годымак эртаралтше «Россия – страна возможностей» всероссийский конкурсышто Людмила Новосёлова «Этнокукла» номинацийыште кокымшо верым налын.
Кажне сеҥымаш участник-влакын мастар улмыштым эше ик гана пеҥгыдемда. Ме тендан дене кугешнена!
Эльвира Терентьева.