Шукерте огыл Морко кундем Кораксола тӱвыра пӧрт пеленысе «Муро кумыл» фольклор ансамбльын чолга участникше-влак Провой вел Ташнур да Поянсола тӱвыра пӧртлашке «Шочмо мланде – чон шепка» концерт дене миен коштыч.
Ташнур тӱвыра пӧртым Алексей Николаевич Дружинин, а Поянсола тӱвыра пӧртым Лидия Алексеевна Платунова ятыр ий вуйлатат. Морко кундем денат кылышт пеҥгыде. Поянсола тӱвыра пӧртыштӧ мемнам уло Марий кундемлан сайын палыме мурызо Михаил Мусов шокшын вашлие. Тудым Морко велыштынат калык чот пагала. Кораксола тӱвыра пӧртышкына кок гана М.Мусов, Г.Яндулова да Г.Васильев толыныт. Калык нуным йывыртен ончен.
Ташнурышто концертышкына 30 еҥ толын гын, Поянсолаште – 40 еҥ. Утларакшым илалшырак-влак лийыныт. Концертнам рӱж ончаш мийыше, шокшо кидсовышыштым пӧлеклыше Провой вел калыклан кугу тау.
Тек ончыкыжымат Морко ден Провой кундем икой дене илат да марий шӱлышым уло тӱнялан шарат!
Елена Григорьева, Кораксола тӱвыра пӧрт вуйлатыше.
