Кугу Ачамланде сарын историйыштыже палемдалтше эн кугу танковый кредалмаште вуйым пыштыше салтак-влаклан Белгородский область Прохоровка посёлко воктенысе пасушто памятникым шогалтыме. Тудым «Третье ратное поле России» культурно-исторческий рӱдерысе «Прохоровское поле» мемориал комплексыште вераҥдыме.
Скульптурный композицийым вӱргене гыч велыме. Тудын кӱкшытшӧ шым метрыш шуэш. Памятник тӱҥыштӧ «Воинам, павшим на Прохоровском поле» манын возымо. Композицийын авторжо Российын калык сӱретчыже, скульптор – Ф.М.Согоян. Автор шке пашаштыже нелын сусыргышо да илыш дене чеверласаш тӧчышӧ пехотинецым аралыше танкистым ончыкта. Тидыже 1943 ий 12 июльысо тале кредалмашын историйжым почын пуа. Вет кредалмаш годым эн кугу нелытше танкист-влак ӱмбаке возын, нуно пехотылан тӱрлӧ семын полшеныт.