Профсоюз толкын чумыр Марий кундемнам илыш дене тӧр вӱда

«Профсоюз – тиде вий,
Профсоюз – тиде ме…»
Лач тыге йоҥген Морко велын делегацийжын девизше Таир ер вӱд серыште эртаралтше республик кӱкшытан кугу мероприятийыште. Тудо сорла тылзын 16-18 кечылаштыже гӱжлен. Марий Эл Республикнан туныктымо аланысе 300 чоло профсоюзын президиумыштыжо тыршыше чолга еҥым «Ме – команде улына!» лагерьысе погын иктыш чумырен.
Погынын ик тӱҥ цельже: туныктымо тӧнежласе профсоюз ушемым вуйлатыше-влакым у вашталтыш дене палдараш, шинчымашыштым пойдараш да илыш дене тӧр ончыко каяш тараташ. Саман эре уэм толеш, илышыш могай-гынат у вашталтыш шыҥдаралтеш, а профсоюз ушемлаште тидын дене палдараш вуйын шогышо уло.
Кум кечыште Марий Элысе туныктымо аланысе профсоюз толкыным вуйлатыше Л.В.Пуртова ятыр лекцийым лудын. Устав, колдоговор, профсоюз пашан вияҥын толмыжо – чылажат пӱсӧ йодыш семын лончылалтын. Лекцийын лектышыжым ужаш манын, кажне кечын районла гыч толшо команде-влак шке коклаштышт кугу таҥасымашке ушненыт. Мемнан Морко кундемна гычат 23 еҥан делегаций миен. Мемнан командынам Морко районысо туныктымо аланын профсоюз ушем вуйлатышыже В.С.Фёдоров ончыко вӱден. Валерий Семёнович шкежат илыш дене тӧр ошкылеш. Профсоюз толкынысо вашталтышым, уэм толмашым чыла пален шога. Лач тудын тыршымыж дене Морко кундемын чолга командыжат «Ме – команде улына!» таҥасымаште лауреат лӱмым сеҥен налын да шарнымашан пӧлек дене палемдалтын.
Тыгай кугу погын Таир ер серыште кажне ийын эртаралтеш. Лагерьыште лач профсоюз ушем вуйлатыше веле огыл, а кажне туныктымо тӧнежыште але йочасадыште тыршыше профсоюзын еҥже каен кертеш. Тидланже чыла район транспорт шотышто йӧным ышта. Ты кугу мероприятийышке икмынярже икымше гана миенна. Погын пеш пайдалын эртен да ончыкшымат у шинчымашым налме амал дене миен толаш чоныштына кумылым ылыжтен да сай шарнымашым коден. Таум каласена Морко районысо туныктымо аланысе профсоюз ушемлан вуйын шогышо В.С.Фёдоровлан да Т.В.Николаевалан. Татьяна Васильевна профсоюз ушемым вияҥден толмашке пеш кугу надырым пыштен шога. Нине чолга ончылъеҥна-влаклан тауштен, ме ончыко каена, илыш дене тӧр ошкылына!
Елена Григорьева, Морко районысо туныктымо аланысе профсоюз толкын президиумын енже.

Снимкыште: Республик кӱкшытыштӧ эртаралтше Ме – команде улына!» лагерьысе погынышто чолгалыкым ончыктышо Морко районын командыже.