Ий гыч ийыш профсоюз толкын шке пашажым виянрак да виянрак шуктен толеш. Теве чумыр республикна мучко туныктымо аланысе профсоюз ушем тунемме идалык тӱҥалтыш гычак шуко мероприятийым эртара. Шукерте огыл Морко кундемысе школлаште тыршыше, шахмат да шашке дене модаш йӧратыше-влак коклаште таҥасымаш лие.
Кыдалаш школ-влак коклаште шахмат дене модмаште 1-ше вер дене Морко посёлкысо 2-шо номеран школ палемдалтын. 2-шо верым Моркысо 6-шо номеран школ налын. 3-шо вер Кокласола лицейлан пуалтын. А тӱҥ школ-влак коклаште сеҥышыш Шордӱр школын командыже лектын. 2-шо верым Шӱргыял школ налын, 3-шо вер дене Купсола школ палемдалтын.
Шашке дене модмаште кыдалаш школ-влак коклаште 1-ше вер дене Моркысо 1-ше номеран школын командыже палемдалтын, 2-шо верым Арын школын командыже налын, 3-шо верым – Октябрьский школ. Тӱҥ школ-влак коклаште 1-ше верыш Шӱргыял школын командыже лектын. 2-шо вер дене Кумыжъял школын командыже палемдалтын. 3-шо верым Шордӱр школ налын.
Елена Григорьева, Шӱргыял школ пеленысе профсоюз ушем вуйлатыше.
Снимкыште: Шашке дене профсоюз таҥасымаште сеҥыше-влак.