Марий Эл Республикысе Правительстве ден Росреестр Марий кундемым «Земля для туризма» проектыш пуртымо шотышто келшымашым подписатленыт.
Проект дене келшышын, туризмым вияҥдаш лÿмын мландым ойырат. Тидлан регионышто штабым чумырат. Тушто кугыжаныш кучемысе тӱрлӧ органын пашаеҥже да туризм сферыште тыршыше специалист-влак пырля ышташ тÿҥалыт.
Кадастровый картыште туристический объект-влакым кушто чоҥаш лийме шотышто информацийым вераҥдат. Тудым инвестор-влакат эскерен кертыт. Келшыше мландым ойырен, шке проектыштым илышыш шыҥдараш йӧн пуалтеш. Кундемыштына этнотуризмым, агротуризмым вияҥдаш келшыше сай вер ятырак, уна-влакланат уло мом ончыкташ. Садлан, илен-толын, Марий Эл ик эн чапланыше туристический регион лиеш манаш, кугу ӱшан уло.