Эртыше кечылаште Российын вице-премьерже М.Хуснуллин регионым вияҥдыме шотышто Правительственный комиссий президиумын заседанийжым эртарен. Тушко Марий Элым Вуйлатыше Ю.Зайцеват ушнен.
Заседаний годым шокшым, вӱдым пуышо да водоотведений аланласе предприятий-влакын паша лектышышт, субъектлаште тарифный кампаний да моло нергенат каҥашеныт.
Марий Элыште ЖКХ услугылан тӱлымӧ шотышто кӱсыным шагалемдаш манын, паша икшырымын шукталтеш. 2024 ий 1 июль гыч ЖКХ-лан тӱлышаш кугыт кокла шот дене 9,5 процентлан кушшаш.
Инфраструктур проект-влакым илышыш шыҥдарыме нергенат ойленыт. Нунылан инфраструктурный бюджетный кредит-влакойыралтыныт. Тыгай проект Марий Элыште икмыняре: Медведево посёлкысо Сеҥымашлан 75 ий темме лӱмеш бульвар, Йошкар-Ола ден Медведево посёлко коклаште верланыше Черняков уремысе каныме вер. Эше ик проект – Йошкар-Оласе аэропортын пассажир-влаклан терминалым чоҥымо паша. Ты объект 40 процентлан ямде.
Д.Речкинын фотожо.