Кундемыштына проектым ышташ туныктымо шотышто тӱнямбал кӱкшытан «йыргешке ӱстел» лийын. Тушко Марий Элысе профессиональный институтын еҥже да Беларусь Республикын 14 колледжше ушненыт. Мероприятий онлайн йӧн дене эртаралтын.
Участник-влак проект пашам вораҥдарымаште кучылтмо эн сай практикышт дене палдареныт. Проект почеш пашам ыштыме годым тӱрлӧ нелылык деч кузе аралалташ лийме нергенат ушештареныт. Кугу тӱткыш кок эл кокласе келшымаш кыллан да опыт дене вашла пайлалтме йодышлан ойыралтын.
Палемдыман, эртыше мероприятий Марий Элысе профессионал шинчымашым пуышо тунемме тӧнеж-влаклан поснак кӱлешан лийын. Вет тыге проект паша-влакым вияҥдаш, нуным чын ышташ тунемыныт.