Садым яра приватизироватлаш лиеш, маныт. Чынак мо?
Т.Михайлова.
Йошкар-Ола.
Росреестрын Марий Эл Республикысе управленийжым вуйлатышын алмаштышыже Александр Берестов вашешта:
– Садым да пакчам яра приватизироватлыме жапым 2031 ий 1 март йотке шуйымо. Ондак 2022 ий 1 март йотке манын палемдыме ыле.
Садоводческий ден огороднический коммерческий огыл товариществе-влакым 2019 ий 1 январь марте ыштыме гын, нунын членышт кугыжаныш але муниципальный собственностьышто улшо сад але пакчалык мланде участкым торг деч посна оксам тӱлыде налын кертыт. Тыгодым мланде участке тыгай условий-влаклан келшен толшаш:
тудым тыгай товариществын иктаж членжылан пуымо огыл;
садоводческий да огороднический товариществылан 2001 ий 30 октябрь марте пуымо мланде участке гыч ышталтын;
мланде участке дене пайдаланаш нимогай чарак уке але оборот гыч кораҥдыме огыл, тудын шотышто кугыжанышыш кӱлешлыкшылан резервыш налме шотышто решений уке.
Мланде участкым налаш манын, садоводческий але огороднический товариществын верланыме самоуправлений органыш йодмашым возыман. Тудын пелен мланде участке верланыме схеме да ты товариществын членже-влак коклаште мландым шеледыме шотышто товариществын членже-влакын тӱшка собранийыштын протоколжо але ты протокол гыч выписке лийшаш улыт.
Тылеч вара верысе самоуправлений орган мланде участкым пуаш але уке шотышто решенийым луктеш. Мландым пуаш келша гын, тудак ты шотышто пунчалым правам регистрироватлыме органыш мланде участкым гражданинын (коммерческий огыл организацийын членжын) собственностьышкыжо оформитлаш манын колта.
Тыгай годым правалан кугыжаныш регистрацийым ышташ кугыжаныш пошлиным тӱлыман огыл. Кугыжаныш регистрацийым ыштыме ЕГРН гыч выписке дене пеҥгыдемдалтеш. Тудым, гражданинлан пуаш манын, верысе самоуправлений органыш колтат.
«Политехник» СНТ-н председательже Альберт Паймаков:
– Кызыт республикыштына стажан садовод-влакын членский книжкашт гына уло, мланде участкылан правам регистрироватлен огытыл. Шукынжо правам яра оформитлен огына шукто манын тургыжланеныт. Приватизацийым 2031 ий 1 март йотке шуйымо нунылан мландым собственностьыш яра налаш полша, тидыже пеш сай.