Марий Эл гыч ты кугу мероприятийыш «Марий Эл» увер агентствын директоржо Евгений Кузнецов ден Марий Эл Радиом вуйлатыше Владимир Матвеев миен коштыныт.
Марий тувырым чиен мийыше кокла гыч В.Матвеев шкетынак лийын. Сандене тудын деке коллегыже-влак лишемыныт. Эсогыл «Рен-ТВ» ден «5 канал» телеканаллаште тыршыше ик журналистше ден операторжо вияш эфир деч ончыч шке передачышкышт войзеныт, да телевизор дене вигак ончыктеныт.
– Тиде моткоч кугу событий лийын. Вет вес элла гычат журналист-влак толыныт. Гостиный дворыш пурен шогалмеке, «Хельсингин саномат» газет гыч толшо пашаеҥ дене палыме лийым да кутырышым. Фойеште ик журналист, марий тӱран тувырем дене ужын шуктенат, кӱчык интервьюм налам, могай йодыш дене толмынам йодам мане да тӱрышкӧ шинчаш йодо. Кок гана эфирыш лекташ йодыч. Вич минут гыч мылам палымем-влак смс-ым возаш тӱҥальычат: «Тыйым эфирыште ужна». Тӱҥалынат шуктен огыл, кок вере эфирыш логалынамат.
А йодышемже тыгай лийын: «Марий Элыште удмурт, татар, марий, руш да моло калыкынат культурыштым ончыктышо туризмым вияҥдаш иктаж программым ышташ лиеш мо? Национальный республиклашке турист-влак толын коштышт манме шонымаш дене, вет вес ийын Калык-влакын икоян улмо идалыкым увертарыме». Тыгак шкем деч туризм шотыштак йодышым ешарнынем ыле: «Але Пушкин карте семынак вес кундемлашке лектын кошташ полшышо еш картым ышташ?»
«Марий Эл Радио ден МЭТР табличке-влакым вашталтен-вашталтен рӱзышым. Но йодышым пуаш ыш логал. Тушко мийыше да залыше шинчыше 700 наре журналист гыч иктаж 20 еҥже гына йодын. А тыгеже Владимир Путиным икымше гана шинчаваш ужынам. Шкаланем иктешлышым: моткоч волгыдо вий-куатан айдеме, пресс-конференцийым пеш моштен, порын, весым шотлен да пагален, шот да радам дене вӱдыш. Мыланем пеш чот виян да сай лектышан пресс-конференций улмыж дене келшыш.