Россий ДОСААФ-ын Марий Эл Республикысе пӧлкаже водитель-влакым ямдыла. Тушто «А», «В», «С», «Д», «Е» категориян правалан тунемаш лиеш. Тыгодым «А» да «В» категорийлан 17 ияш гыч, а «А1» категорийлан 16 ияш гыч налыт.
Тыгак эше икмыняр направлений дене туныктат: машинам ачалыше слесарь-электрик; аккумуляторщик; водитель-электромеханик; дизелист-электрик; водительский да методический мастарлыкым шуарымаш.
18 ийым темыше «В» категориян водительым «С» категорийлан туныктат. «С» категориян-влакым «Д»-лан – 21 ийым темымеке. «Е» категорийым налаш манын, «С» категорий дене ик ий утла машинам виктарыме опыт лийшаш.
Тичмаш курсым эртымеке, «А1» категорийлан 16 ий деч кугурак, а «В», «С» категорийлан 17 ияш деч кугурак-влак ГИБДД-ште экзаменым кучат.
Тунемаш пураш манын, фотом, автомашинам ойырымо категорий дене виктарен кертме нерген справкым, паспортым, СНИЛС-ым да тунемаш пураш йодмашым пуыман.
Йодмашым идалык мучко пуаш лиеш. Тунеммаш кум тылзат пеле марте шуйнен кертеш. Занятий-влак кечывалым да кастене эртаралтыт.
Водитель-влакым ямдылыше республикысе школвлак кокла гыч ДОСААФ ик эн ончыл верыште.
Призывник-влак оксам тӱлыде тунемыт. Тунеммылан оксам Обороно министерстве тӱла. Но тунем пытарымеке, курсантым вигак службыш наҥгаят.