11-12 майыште Угарман кундемысе Бор олаште кирым нӧлтымӧ дене ты кундемын чемпионатше лийын. Тушто Россий МЧС-н Марий Элысе тӱҥ управленийжын пожарныйже Радиф Алексеев таҥасен. Рвезе чемпион лӱмым сулен. Июньышто тудо спортын ты видше дене Российын чемпионатышкыже ушна. Таҥасымаш Улан-Удэ олаште лиеш. Р.Алексеев кирым нӧлтымӧ спортын 78 килограмм нелытан-влак коклаште двоеборье дисциплиныштыже (32 килограмм нелытан кок кирым толчок-рывок семын) нӧлташ тӱҥалеш.
Шиждымын, вучыдымын
Алексеевын спортыш толмо корныжо да Российысе таҥасымашлан ямдылалтмыж нерген мутланышна. Тудо тыгерак каласкалыш:
– 2017 ийыште Россий МЧС-н Марий Элысе 6-шо пожарный частьышкыже пашаш толынам. Тунам пожарный часть-влак коклаште кирым нӧлтымӧ дене таҥасымаш лийын. Мыланем тушко ушнаш темленыт. Таҥасымаште 24 килограмм нелытан кок кирым нӧлташ кӱлын. Мый нылле гана нӧлтенам. Тылеч ончыч тыгай спортышто шкем ик ганат терген омыл ыле.
Таҥасымаш деч вара мый шиждымын-вучыдымын ты спортыш толынам. 2018 ийыште 32 килограмм нелытан кирым нӧлташ тӱҥалынам. Тыгайжым спортын ты видыштыже профессионал спортсмен-шамычат тӱрлӧ таҥасымашыште нӧлтат. Ты ийынак Йошкар-Оласе Политех пеленысе спортзалыште Сергей Иванович Максимов дене шуаралтынам. Неле лийын, но тренировкыш эреак кошташ тыршенам. Районысо, республикысе, Юл кундем округысо таҥасымашлашке коштынам. 2020 ийыште Чуваш Республикысе Канаш олаште эртаралтше таҥасымашыште спорт мастерыш кандидатлык нормативым шуктенам.
Ик жап спортым коден кайыме шотышто шонымашат шочын ыле. Тунам ныл тылзе чоло шот дене тренироватлалтынат омыл, результат куандарен огыл. Лийын тыгаят – кок але кум арня дене тренировкыш коштын омыл. Тидыже варажым тӱрлӧ таҥасымаш годым койынак палдырнен. Но, вий-куатым налын, ончычсо режимыш уэш пӧртылынам да тренироватлалташ тӱҥалынам. Кирым чыла вере коштыктем. 2022 ийыште Юрино районышто пожарым йӧртымашкат киры пырля намиенам ыле.
Изинек спортым йӧратен, пожарный лияш шонен
Радиф Марий Турек район Алексеевский селаште шочын-кушкын. Изинек спортлан шӱман лийын. Но ялыште спорт дене профессионально заниматлаш йӧн уке. Сандене рвезе шке семын веле шуаралтын.
– Ече дене кошташ моткоч йӧратенам. Школышто тунеммем годым телевизор дене биатлоным, ече дене куржталмашым эреак эскерен шогенам. Кандашымше класс марте шкенан селасе школышто тунемынам, вара Марий Турек посёлкысо школыш кусненам. Туштат ечылан кумылан лийынам, тӱрлӧ таҥасымашыште вием тергенам. Шарнем, тунам сеҥыше-влакым тӱрлӧ пӧлек дене куандареныт. Мыланем икана ече крепленийым пуэныт. Моткоч йывыртенам, тылеч вара эре сай результатым ончыкташ тыршенам.
Школ деч вара армийыш каенам. Уссурийск оласе танковый войскаште службым эртенам. Толмекем, кӱртньӧ омсам ыштыме предприятийыште ик жап ыштенам. Но мый эреак пожарный лияш шоненам. Ты пашаш пураш икмыняр гана тӧченам. Кумшо гана мийымемлан – налыныт, – шарналтыш спортсмен.
Ончылно – кугу таҥасымаш
Июньышто Р.Алексеев Улан-Удэ олаште эртаралтше Российын чемпионатышкыже кая. Ямдылалтмыж нерген тыгерак палдарыш:
– Кеч-могай спортсменын лектышыже сайын кочмо, тренироватлалтме, жапыштыже каныме деч шога. Ончылнем – кугу старт. Тидлан психологически ямде лийман. Улан-Удэ олаште жап Марий Эл деч вич шагатлан ондакырак кая. Тидлан кугу тӱткышым ойырем. Садлан кызыт кум шагат эрденак кынелам. Эр кочкышым ыштем, индеш шагатлан мыйын кечывал кочкыш. Тылеч вара икмыняр жап канем, нералтем, манаш лиеш.
Р.Алексеев дене мутланыме годым тудын илышыштыже лийше тӱрлӧ татым шарналтышна. Тушечын шканем теве мом палемдышым: Радифын шонымашке шуаш тыршымыже, еҥ-влаклан полшаш шонымыжо, ответственный койышыжо изинекак палдырненыт. Школышто тунеммыж годым куэшинчам (чага) поген ужален. Ыштен налме окса Алексеевмытын суртышкышт газым пуртымо годым кугун полшен. Кызыт Алексеев шонымыж почеш пожарный лийын, кугу спортыш толын, пашам ыштымыж годым профессионал шинчымашым налын. Ынде рвезе спорт мастерлан нормативым шуктынеже. Ме тудлан шонымашкыже шуаш уло кумылын тыланена!
Радиф Алексеев арняште кум кечым тренировкылан ойыра. Заниматлымеке, коло минут чоло капкылым лывыртымылан ойыра. Тыге тудо организмлан таушта. А моло кечылаште организм канышаш, пеҥгыдемшаш, шке пашажымат шуктышаш. манеш. Жапым арам эртараш огыл манын, коклан куржталаш лектеш, тӱрлӧ упражненийым ышта.
Еш альбом гыч налме фото-влак.