Пожар нимом ок чамане

Кеҥежымсе пожар-влак шукыж годым айдемын титакшылан кӧра лийыт. Пӱртӱс пожарын тӱҥ амалже – тулым шотдымын кучылтмаш. Пожар лӱдыкшыдымылык правил-влакым шуктымым тергыме амал дене кугыжаныш пожар надзорын пашаеҥже-шамыч профилактике сынан ятыр мероприятийым эртарат. Утларакшым – каныш кечылаште, лач тунам шуко еҥ пӱртӱсыштӧ кана.

Шукерте огыл кугыжаныш пожар надзорын, тыгак Марий Элысе МВД-н, Пӱртӱс ресурс, экологий да йырым-йырысе кумдыкым аралыме министерствын да верысе самоуправлений органын пашаеҥышт дене пырля республикысе районлаш профилактике сынан рейд дене лектын коштыныт. Эн ончыч еҥ-влакын тӱшкан каныме верлаште да пожар лӱдыкшыдымылык шотышто утларак ямде улмо режимым пуртымо районлаште лийыныт. Еҥ-влаклан тулым кучылтмо да тулотым ылыжтыме годым Российыште пожар лӱдыкшыдымылык режим правилым шукташ кӱлмӧ нерген ойленыт.

Тулым ылыжтыме годым шарныза:

– тулым 0,3 метр келгытан да 1 метр марте диаметран лӱмын кӱнчымӧ лакыште але кӱртньӧ гыч келыштарыме ёмкостьышто (мангал, бочко, бак) ылыжтыман;

– тулым зданий, сооружений, склад, шудо каван деч 50 метр, иман чодыра але посна кушшо тыгай пушеҥге деч 100 метр да лышташан чодыра але посна шогышо тыгай пушеҥге деч 30 метр тораште гына ылыжташ лиеш;

– тулым ылыжтыме вер деч 10 метр радиусан кумдыкым шогышо да йӧрлшӧ кукшо пушеҥге, укш, шудо да вашке ылыжше моло материал деч эрыктыман. Тиде кумдык пожар ваштареш келыштарыме 0,4 метр лопкытан полоса дене ойырымо лийшаш;

– тулым ылыжтыше еҥын пожарым йӧрташ средствыже да пожарныйым ӱжыкташ мобильный телефонжо лийшаш.

Торфан, тыгак пожар лӱдыкшыдымылык режимым увертарыме жапыште, иман пушеҥге йымалне, тале мардеж годым тулым ылыжташ ок лий.

Пожар лӱдыкшыдымылык правилым пудыртымылан мутым административно кучаш логалеш (штраф – 10 гыч 20 тӱжем теҥге марте).

Россий МЧС-ын Марий Элысе управленийжын полшымыж дене ямдылыме.

Интернет гыч налме фото.