Пожарлан кӧра погылан эҥгек ышталтын але тудо тӱрыснек йӱлен гын, кундемыштына илыше еҥ-влаклан тений 1 январь гыч социальный полыш шотеш 100 тӱжем теҥгем ик гана тӱлат. Оксам пуымо радамым Марий Эл Республикысе Правительствын 2023 ий 20 октябрьыште лукмо 503-шо пунчалже почеш пеҥгыдемдыме, палдара Марий Эл Республикын Паша да социальный аралтыш министерствыже.
Айдемын тӱшка собственностьышто пайже веле уло гын, пайын ужашыжым ончен тӱлат.
Тыгай полышым налаш теве кунам айдемын праваже уло:
— йӱлышӧ пӧрт Марий Элыште верланен,
— эҥгекыш логалше еҥ суртлан оза але социальный найм договор почеш айлен ила да собственностьыштыжо вес илыме верже уке.
Соцполышым налаш манын, пожар лиймеке, куд тылзе жапыште пӧрт верланыме районысо социальный полышым пуымо рӱдерыш йодмашым возыман да тыгай документ-влакым пуыман:
— личностьым пеҥгыдем-дыше документын (тулышто йӱлен огыл гын) копийжым;
— Российысе Гражданский обороно, чрезвычайный ситуаций да стихийный бедствийын кышажым кораҥдыме шотышто министерствын Марий Элысе тӱҥ управленийжын пуымо пожар нерген справкын копийжым;
— кредитный организацийыште почмо лицевой счётым да тудын реквизитшым ончыктыман документын копийжым (оксам кредитный организаций гоч налаш шонымо годым);
— уполномоченный представительын личностьшым да полномочийжым пеҥгыдемдыше документын копийжым (йодмашым уполномоченный представитель воза гын);
— илыме верлан правам пеҥгыдемдыше документын копийжым (тудлан правам ЕГРН-ыште регистрироватлыме огыл гын);
— илыме вер дене пайдаланаш правам пуымым пеҥгыдемдыше документын копийжым (социальный найм договор почеш айлен илыме годым).
Нине документ деч посна пӧрт оза шке кумылын тыгай документ-влакым пуэн кертеш:
— пожар лийме илыме верлан правам (пайым) пеҥгыдемдыше документым (ЕГРН гыч выписке, тушто ты илыме верлан правам регистрироватлыме нерген сведений лийшаш) (правам ЕГРН-ыште регистрироватлыме годым);
— йодмашым возышын Марий Элыште эре илымыжым пеҥгыдемдыше документын копийже.
Нине документ-влакым айдеме ок пу гын, социальный полышым пуышо рӱдер кӱлеш орган ден (але) организаций гыч шке йодеш.