Звенигово районысо Поянсолан лӱмжӧ кок мут гыч шога – «поян» ден «сола». Ял чынжымак поян мо? Тиде йодышлан вашмутым муаш манын, Провой велыш тарванышна.
Ондак Поянсола ял шотан илем лийын, тушко куд ял пурен: Кугу Кожвож, Изоткин Кутыр, Кожвожмучаш, Нурдамучаш, Нурӱмбал, Поянсола. 2006-шо ийыште тудо Кужмарий администрацийыш ушнен.
Ялыш пурымаште кок пачашан школ волгалт шинча. Тудым шке жапыштыже республикна мучко чапланыше «Новый путь» ялозанлык чоҥен. Тыште 500 икшыве тунемын кертеш ыле, но илыш вашталтме да йоча шагалемме дене тиде оралтыште тӱҥалтыш школ да йочасад гына пашам ыштат.
Школ воктенак кок пачашан, шемалге-йошкар у леведышыж дене торашке волгалтше тӱвыра пӧрт верланен. Тушто мемнам клуб вуйлатыше Лидия Платунова порын вашлие, шке пашаж дене палдарыш, оралтым ончыктыш.
Кум ял гыч коштыт
Поянсола ФАП-ым 2014 ийыште почыныт. Фельдшерлан Л.Н.Черняева пашам ышта.
«Тиде ялешак шочынам, школым пытарымеке, Йошкар-Оласе медучилищыште фельдшерлан тунемынам. Вара ялышкем пӧртыльым да медпунктышто пашам ышташ тӱҥалынам. Медициныште 53 ий тыршем.
ФАП-ышке кум ял гыч толыт, 907 еҥ шотлалтеш. Йочасадна, тӱҥалтыш школна улыт, сандене икшыве-влакат толыт. Пашам ыштыше-влак утларакшым процедурыш коштыт. Нунылан уколым, магнитотерапийым ыштена», – каласыш Людмила Николаевна.
Шочмо сурт
Ял урем дене ошкылмына годым ик сурт воктене машинам мушшо пӧръеҥым ужна, лишкырак миен палыме лийна.
Умбакыже газетнан 23 апрельыште лекше номерыштыже лудса.