Тӱрлӧ ола, район гыч толшо самырык автор-влак койыш-шоктышышт, илыш умылымашышт дене ойыртемалтыт, но икте нуным уша. Тиде – марий тӱвырам йӧратымаш. Кажныже шке пашаштышт Марий кундемым, йылмым, калыкым мокта. Адакшым кажныжын капыштыже – марий вӱр. 
Пу арвер – кызытсе саманыште
Марий-влак ожнысек чодыра пашалан мастар улыт. Ончыч ятыр кӱмыж-совла пу лийын. Пу шондыкышто вургемым араленыт, пу гыч мотор окнасергам ыштеныт. Кызытат марий еҥ, чодыраш пулан толмеке але емыж-саскам погымеке, чодыра Юмылан таушта.
Пу арвер тачысе жаплан кӱлешлыкшым йомдарен огыл. Мӧҥгешла, шукын пу пӱртым чоҥат, кухньышто пу талиҥгам, йытырым, чайгоркам, коркам, эсогыл совлам кучылташ тӱҥалыныт. А молан уке?! Пу мотор да тазалыклан эҥгекым ок кондо.
Кундемыштына «ЕВА Марий ЭЛ» кӱмыж-совла бренд палыме. Тудын нерген Юлия Ермакова палдара:
– Бренд Ермаков Владимир Алексеевич ачамын лӱмжӧ гыч шочын. Тудын илышыже 30 ий пум пӱчкедыме сомыл дене кылдалтын. Ачам палыме мастаръеҥ, сӱретче. Мый шкежат сӱретче улам, но пу дене пашам ыштен ом мошто.
Пандемий годым интернет гоч «ЕВА МАРИЙ ЭЛ» лӱм дене сатум ужалаш тӱҥалынам. Брендын логотипше шарнымашеш кодшо манын, кузе сӱретлаш шуко шоненна. Ме Шернур район Купран ял гыч олыкмарий улына. Кундемна сылне, йырваш тӱрлӧ олык пеледыш кушкеш. Сандене логотипыштына пеледышым сӱретлыме, а тушто ЕВА лӱмым возымо. Акым ончыктымаштат, визиткыштат Марий кундемын, утларакшым шочмо ялын пасу ден олыкын фотоштым ужаш лиеш.
Ермаковмыт еш пашаштыже марий традиционный формым арала. Корка, мӱй пӱрылан изи печке, марий орнаментан поднос да молат кумылым савырат.
– Ачам станокым ок кучылт, чылажымат шке кидше дене ышта. Писте пу гыч товар дене эн ончыч йыргешкым пӱчкеш, вара тӱрлӧ стамеске дене арверым ышта. Кӱмыж-совлам шӱч дене «шоҥгемдена» але сорта тулеш шемемдена да вара шкуритлена, – манеш Ю.Ермакова.
Юлия пу кӱмыж-совлам «Свои» мини-маркетыште, тӱрлӧ ярмиҥгаште, соцкыллаште ужала. Ермаковмыт еш пашам оксалан кӧра огыл, а шӱм-чон йодмо почеш ышта, йӱлаш пурышо марий ыштыш-кучышым арален кодаш тырша.
Ю.Ермакован альбомжо гыч налме фото-влак.