Инди рок, этно-панк рок…
Пеледыш пайремыште мурызо Йырмари Мари дене пырля Москосо «Луговые мари» группо мастарлыкшым ончыктен. Группо инди-рок стильысе шугейз жанрыште, этно панк-рок да моло тӱрлӧ музык стильыште семӱзгарым шокта, рушла да марла мурым мура. Концертыштышт марий образым кучылтыт. Группын лидерже Кеша Несмелов шкенжым марийлан шотла.
– Мый Кострома кундемыште шочынам. 20 ийым эртымеке, тукымыштына Угарман марий лийме нерген пален налынам. Тылеч вара марий калык нерген шуко литературым лудынам, йылмым тунемаш тӱҥалынам. Сайын ойлен эше ом мошто, но марла умылаш тыршем, – каласыш музыкант.
Марий-влак нерген сайынрак палаш манын, рвезе Угарманыште, Киров кундемыште лийын. Вара ик жап Марий Элысе Медведево посёлкышто илен. Лачак тунам «Луговые мари» проектше шочеш. Группым поген, самырык еҥ-влак мӧҥгысӧ студийыште икмыняр композицийым возат да ВК-шке луктыт.
– Тунам икымше колыштшо-влак лектыныт. Нунын коклаште историй науко кандидат Сергей Свечников лийын. Тудо альтернативный музыкым колышташ йӧрата улмаш. А мый шке жапыштыже черемис сар нерген тудын лекцийжым онченам. Тыгай еҥын мемнан усталыкнам аклымыжлан ӧрынна, но чот куаненна, – ойла К.Несмелов.
Группо чӱчкыдын вашталтын. Кызыт тушто нылытын улыт. Группын лидерже мура, гитар, мелодике да шӱвыр дене шокта.
– Шӱвырым мылам М.Шкетан лӱмеш Марий драмтеатрын артистше Сергей Данилов ыштен. Тиде семӱзгар дене Москошто вӱд воктене шокташ тунемынам. Такшым музыкальный образованийна мемнан уке, шкенам художник-футуристлан шотлена. Тӱрлӧ музык фестивальыш ушнен, марий калык нерген палдарена, – каласыш Кеша.
Шукерте огыл группын «Йӧратем» да «Ола» мурышт лектыныт. Нине композицийлаште поснак раш калык мотив йоҥга. Мо оҥайже, «Луговые мари» группышто иктат марла мутланен огеш мошто, но кажныже нуным ончаш толшо еҥ-шамычлан марий калыкын тӱвыраже оҥай да поян улмо нерген палдарынеже. Тидланак кӧра выступленийыштышт марий образым кучылтыт. Мутлан, Васли кува ден Васли кугыза семын чиен лектыт да тидын дене ончаш толшо-влакым Шорыкйол пайрем дене палдарат.