Шошо призыв тений 1 апрель гыч 15 июль марте шуйна.
Российыште кодшо ийын службылан йӧрышӧ икмыняр тӱжем призывникым армийыш налын огытыл – воинский часть-влакым комплектоватлыме ыле. Закон почеш рвезе-влак вес призыв почеш служитлышаш улыт. Тугеже нунылан угыч медкомиссийым эртыман да кагаз-влакым оформитлыман.
Кугыжаныш Думышто палемденыт: тидыже призывник-влакын веле огыл, военкомат-шамычынат пашаштым нелемда, здравоохраненийлан сомылым ешара. Сандене законопроектым ямдылыме: военный службылан йӧрымӧ шотышто документым ик ийлан шуяш. Ты закон илышыш апрельыште пурталтеш.
Шошо призывын эше ик ойыртемже – электрон повестке шотышто эксперимент. Российысе кум регионышто: Марий Эл Республикыште, Рязань да Сахалин областьлаште – кагаз повестке дене пырля электрон повесткым колтат. Варажым тиде опытым моло кундемыштат шыҥдараш шонат.
Тыгай повестке Госуслугысо личный кабинетышке колталтеш да кучыктымылан шотлалтеш. Призывник тудым ужын але ужын огыл, тидым ончаш огыт тӱҥал. Повестке почеш амал деч посна военкоматыш мийыдыме еҥ-шамычлан 10-30 тӱжем теҥге штрафым тӱлыктат. А службо деч шылше-влаклан 200 тӱжем теҥге штрафым пуэн але кок ий марте эрык деч посна коден кертыт.