«Кугарня», «Ямде лий» газет редакций-влакын журналистышт марий эстрадын шӱдыржӧ-влак дене пырля Башкортостан кундемыш марий родына-влак деке каеныт. Теҥгече миен шумеке вигак Октябрьский олаште марий концертым ончыктеныт, газет паша, редакций илыш нерген каласкаленыт. Таче Шаран районысо школлаште улыт. Енахмат школышто туныктышо, тунемше-влак дене вашлийме деч ончыч Шадт Булатлан (тиде ялыште шочын) памятник ончылан пеледыш аршашым пыштеныт. Вара Мещер школышто уна лийыныт.
— Тыште мемнам чыла вере куанен вученыт, кинде-шинчал дене вашлийыт. Сандене мутланымаш дене гына огына серлаге, калык кумылым нӧлталаш концертымат ончыктена. Роза Искакова, Вадим Краснов, Сергей Пакеев пеш келыштарат.
Теҥгече Н.М.Давлетова дене уна лийынна. Марий ӱдырамаш, предприниматель ешыж дене мемнам пеш шокшын вашлийыч. Шарналташлан редакций деч пӧлекым кучыктенна, — манеш «Кугарня» газетын тӱҥ редакторжо Ирина Степанова.
«Кугарня» гыч тыгак Ирина Александрова, Валентина Семёнова, Зоя Тимофеева-Висвис журналист-влак да «Ямде лий» газетын тӱҥ редакторжо Людмила Григорьева улыт.
