6 июльышто Пошкырт кундемыште Мишкан селаште финн-угор калык-влакын «Мотивы финно-угрии» музык усталык фестивальышт эртаралтын.
Тушто Одо кундемысе Завьялово, Воткинск районла, Дебёсы села, Покырт кундем Калтаса, Краснокам, Татышле, Стерлитамак районла, Янаул ола, Екатеринбург, Йошкар-Ола гыч участник-влак ушненыт. Марий Элын чапшым «Сото вий» ансамбль ден «Кас сем» ушем араленыт.
Фестивальын программыже моткоч оҥай лийын. Тӱрлӧ конкурс, мастер-класс-влакым эртареныт, «Сон на ульях» отарыш этно-туристический маршрут дене коштыныт. Тыгак Мордовий Республикын «Торама» кугыжаныш фольклор ансамбльже шке выступленийже дене куандарен. Ты ансамбль мордва калыкын муро ден семӱзгар йӱлам 34 ий арала.
Фестиваль эн сай коллектив-влакым суапландарыме да этно-дискотеке дене мучашлалтын. «Кас сем» ушем участникын дипломжо дене палемдалтын гын, «Сото вий» ансамбль «Вокально-инструментальный усталык» номинацийыште кокымшо верым налын, тудлан 10 тӱжем теҥгеаш сертификатым пуэныт.